Baqytjan Saǵyntaev qalanyń bilim berý júıesin damytý boıynsha alqa keńesin ótkizdi
ALMATY. QazAqparat – Almatyda qala ákimi Baqytjan Saǵyntaevtyń tóraǵalyǵymen bilim basqarmasynyń alqa keńesi ótti, dep habarlaıdy QazAqparat tilshisi.
Onlaın rejımde ótken alqa jıynynyń jumysyna QR Bala quqyqtary jónindegi ýákil Arýjan Saın jáne jeke bilim berý uıymdary respýblıkalyq qaýymdastyǵynyń tóraıymy Roza Sadyqova qatysty.
Jıyn barysynda mektepter men balabaqshalardaǵy oryn tapshylyǵyn azaıtý, apatty mektepter men úsh aýysymdy bilim berý problemalaryn sheshý, qashyqtan oqytdyń sapasy, sondaı-aq jeke menshik balabaqshalardaǵy ata-analardyń tólemin sýbsıdııalaý boıynsha sharalar qaraldy.
Almaty qalasynyń ákimi Baqytjan Saǵyntaev bilim berý júıesindegi máseleler oń sheshimderin taýyp jatqanyn atap ótti. Maqsat – «Shetsiz qala» qaǵıdatyn eskere otyryp, búkil qala boıynsha bilim berýdiń sapasyn birdeı arttyrýdy qamtamasyz etý. Munda úkimettik emes sektormen jáne qoǵamdyq uıymdarmen ózara tyǵyz is-qımyl ornatylǵan.
«Bizdiń mindetimiz – pandemııaǵa qaramastan, óz paryzymyzdy jaýapkershilikpen jáne adal oryndaý. Balalardy tárbıeleý kóbinese balabaqshalarda mektepke deıingi bilim berý protsesiniń qalaı uıymdastyrylýyna baılanysty», - dedi B.Saǵyntaev.
Bala týý kórsetkishiniń joǵary bolýyna jáne belsendi kóshi-qon protsesterine baılanysty ákimniń tapsyrmasy boıynsha balabaqshalar men mektepterdegi oryn tapshylyǵy men kezek kútý máselelerin sheshý boıynsha sharalar kúsheıtildi.
Bilim basqarmasynyń basshysy Lázzat Jylqybaeva búgingi kúni mektepke deıingi tárbıemen 1 jastan 6 jasqa deıingi 65 080 bala, 3 jastan 6 jasqa deıingi 57 020 bala qamtylǵanyn baıandady.
Ákimdik 5 jyl ishinde balabaqshalarda 20 myńnan astam jańa oryn ashýdy josparlap otyr. Qosymsha bilim berý boıynsha Alataý jáne Naýryzbaı aýdandarynda ınnovatsııalyq shyǵarmashylyqtyń eki ortalyǵyn salý josparlanǵan, keler jyldan bastap qazirgi Oqýshylar saraıyn modernızatsııalaý bastalady.
Pandemııaǵa qaramastan, kontıngent 12 myń balaǵa artty, onyń ishinde 1-shi synypqa 27 myńnan astam bala qabyldandy. Mektepterde oryn tapshylyǵyn kezeń-kezeńmen sheshý úshin 2025 jylǵa deıin bilim berý nysandaryn salý baǵdarlamasy ázirlendi.
Orta bilim berý salasynda apatty mektepterdi joıý jáne mektepterdiń shamadan tys júktelýi erekshe baqylaýǵa alynǵan. «Jumyspen qamtýdyń jol kartasy» aıasynda 2021-2022 jyldary apatty jáne shamadan tys júktelgen dep tanylǵan mektepterdiń ornyna jańa mektepter salynady. 2022 jylǵa deıin 12 600 oryndyq 8 mektep jáne 6 550 orynǵa arnalyp mektepterge 13 qosymsha ǵımarat salý josparda. Sondaı-aq, apatty mekteptiń ornyna 2021 jyly 1500 oryndyq jańa mektep salynady. Bilim berýdiń alǵashqy jańa nysandaryn 2021-2022 oqý jylynyń basynda paıdalanýǵa berý jáne sol arqyly mektepterdegi oryn tapshylyǵyn 73%-ǵa tómendetý kózdelgen.
Sonymen birge, qashyqtan bilim berý sapasyn arttyrý úshin otandyq «Online Mektep» jáne «Sfera» otandyq bilim berý platformalary belsendi qoldanylady. Sondaı-aq jergilikti bıýdjet esebinen 42 myń kompıýterlik tehnıka jáne Úkimettiń rezervtik qory esebinen 38,5 myń kompıýterlik tehnıka satyp alyndy. Internet ótkizgishtigi tómen 169 aımaqta ınternet jelisiniń jyldamdyǵyn arttyrý úshin qosymsha antennalar ornatylǵan. 30 myńnan astam sımkartalar muqtaj otbasylarǵa berildi.
Qala ákiminiń bastamasy boıynsha jeke menshik balabaqshalardaǵy ata-ana tólemin jergilikti bıýdjet esebinen sýbsıdııalaýǵa erekshe nazar aýdaryldy.
«Almaty qalasy ákimdiginiń memlekettik tapsyryspen jeke menshik mektepke deıingi uıymdarda tamaqtanýdy jergilikti bıýdjetten sýbsıdııalaý boıynsha qabyldaǵan is-áreketteri qolaıly jaǵdaı jasaıdy jáne qalamyzdyń jeke mektepke deıingi bilim berý kásipkerligin damytýdy yntalandyrady. Memlekettik tapsyrysty ornalastyrmaıtyn jeke menshik balabaqshalar adal básekelestik arqyly baǵa deńgeıin retteıdi. Mundaı is-sharalar bizdiń artqa sheginbeı, bir orynda turyp qalmaı, alǵa jyljıtynymyzǵa, óz jumysymyzdyń nátıjesin kóretinimizge senim beredi. Óz atymnan, jekemenshik bilim berý salasy ókiliniń atynan Almaty qalasynyń ákimdigine osy usynysty bastaǵany úshin alǵys aıtýǵa ruqsat etińizder», - dedi jekemenshik bilim berý uıymdary Respýblıkalyq Qaýymdastyǵynyń tóraıymy Roza Sadyqova.
Óz kezeginde Qazaqstan Respýblıkasyndaǵy bala quqyqtary jónindegi ýákil Arýjan Saın bilim berý protsesiniń qaýipsizdigi, ınklıýzıvti jáne qosymsha bilim berý, tamaqtaný sapasy, sondaı-aq bilim berý salasyndaǵy uıymdardy basqarý sapasyn arttyrý ádisteri máselelerin qozǵady.
Alqa otyrysynyń qorytyndysy boıynsha Almaty qalasynyń ákimi Baqytjan Saǵyntaev balabaqshalar men mektepterdegi balalardyń tamaqtaný sapasyn baqylaý, jan basyna shaqqandaǵy qarjylandyrý máseleleri boıynsha birqatar naqty tapsyrmalar berdi. Epıdemııalyq ahýal boıynsha qalanyń «sary» aımaqqa kirýi barysynda oqýshylardyń densaýlyǵyn qorǵaý úshin kezekshi toptarda sanıtarlyq-epıdemııalyq qaýipsizdikti qamtamasyz etý boıynsha sharalardy kúsheıtý tapsyryldy.
«Eń mańyzdysy – balalardyń densaýlyǵy. Sondyqtan epıdemıologtar belgilegen qaýipsizdik talaptaryn qatań saqtaý qajet», - dep atap ótti B. Saǵyntaev .
