Baqytjan Saǵyntaev ımıdjdik is-sharalarǵa bólinetin shyǵystardy qysqartpaq
ALMATY. QazAqparat - Almaty ákimi Baqytjan Saǵyntaev jedel áreket etý óńirlik shtabynyń otyrysyn ótkizdi, dep habarlaıdy QazAqparat tilshisi.
Otyrysta qalanyń áleýmettik-ekonomıkalyq turaqtylyǵyn saqtaý jónindegi sharalar pysyqtaldy.
Búginde shtab ókilderi megapolıstegi barlyq salalar boıynsha daǵdarysqa qarsy sharalar paketin ázirlep jatyr. Qala ákimi áleýmettik mańyzy bar azyq-túlik taýarlaryna baǵanyń ósýin tejeý, halyqtyń áleýmettik osal toptaryn qoldaý, jumys oryndaryn saqtaý jáne qurý, jalaqyny ýaqytyly tóleý, ShOB jáne ekonomıkanyń naqty sektoryn qoldaý sııaqty basym mindetterdi qoıdy.
Jıynda MÁMS júıesinde tegin medıtsınalyq kómektiń kepildendirilgen kólemi men medıtsınalyq qyzmetterdi qamtamasyz etý, áleýmettik nysandar qurylysyna ınvestıtsııalardy tartý jáne ony ulǵaıtý, jumys oryndaryn saqtaý, daǵdarysqa qarsy sharalardy iske asyrý boıynsha aqparattyq-túsindirý jumystaryn júrgizý jónindegi sharalar da tilge tıek etildi. Bilim berý, mádenıet jáne sport salasynda az qamtylǵan otbasylardyń balalaryn qoldaýǵa erekshe nazar aýdarylatyn bolady.
Sonymen qatar, bıznesti qoldaý jáne kásipkerlikti damytýdy yntalandyrý, halyqtyń áleýmettik álsiz toptaryn qoldaý, bıýdjet saıasatyn ońtaılandyrý, salyq jáne ózge de tólemderdi ákimshilendirý sharalary qarastyryldy. Budan basqa, tehnıkany, jıhazdardy satyp alýǵa jáne ımıdjdik is-sharalardy ótkizýge arnalǵan bıýdjettik shyǵystardy qysqartý qarastyrylýda.
Quzyrly organ ókilderiniń aıtýynsha, qazir qalada koronavırýs juqpasy joq.
Búginde qalada 490 adam karantınde jatyr. Olardyń 407-si úılerinde oqshaýlansa, qalǵany túrli medıtsınalyq mekemelerinde statsıonarda jatyr.
Karantındegi tulǵalardyń eshqaısysynda kataraldy belgiler bilinbeıdi.
Osy juqpanyń aldyn alý maqsatynda indetke qarsy profılaktıkalyq sharalar kesheni qolǵa alyndy.
