Baqytjan Saǵyntaev halyqqa memlekettik qyzmetter usyný úderisterin jetildirý jóninde keńes ótkizdi
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev QR Prezıdenti Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» Joldaýyn iske asyrý aıasynda halyqqa memlekettik qyzmetter usyný úderisterin jetildirý jóninde keńes ótkizdi.
Keńes barysynda «Azamattarǵa arnalǵan úkimet» Memlekettik korporatsııasy arqyly memlekettik qyzmetter kórsetý úderisterine jańa tehnologııalar engizý máseleleri talqylandy.
Memleket basshysy halyqqa Joldaýynda memlekettik qyzmetter kórsetý úderisteri barynsha ońtaılandyrylýy tıis ekenin atap ótti. Merzimderdi jáne qujattar tizimin qysqartyp, qaıtalanatyn rásimderdi joıyp, mindetti jeke qatysýynsyz elektrondy formatqa kóshirý qajet. Osyndaı baǵyttardyń biri qyzmet alýshynyń qatysýynsyz proaktıvti qyzmet kórsetýlerge kóshý bolýy tıis.
Aıta keteıik, «Azamattarǵa arnalǵan úkimet» Memlekettik korporatsııasy - QR Úkimetiniń 2016 jylǵy 29 qańtardaǵy Qaýlysymen qurylǵan jáne front-keńseler, ózine-ózi qyzmet kórsetý sektorlary, utqyr HQKO-tary, poshta baılanysynyń aýyldyq bólimsheleri arqyly qyzmet kórsetetin biryńǵaı memlekettik qyzmetterdiń provaıderi.
Qazirgi ýaqytta Qyzmet kórsetý tiziliminde 723 memlekettik qyzmet bar, Memlekettik korporatsııa arqyly olardyń 548-i qoljetimdi, olardyń 75% astamy «bir tereze» qaǵıdasy arqyly qyzmet kórsetedi.
