Baqytjan Saǵyntaev Grýzııanyń vıtse-premerimen kezdesý ótkizdi
ASTANA. QazAqparat - Búgin Astana ekonomıkalyq forýmy aıasynda QR Premer-Mınıstri Baqytjan Saǵyntaev Grýzııanyń Premer-Mınıstriniń orynbasary - Syrtqy ister mınıstri Mıheıl Djanelıdzemen kezdesý ótkizdi, dep habarlaıdy primeminister.kz saıty.
Kezdesý barysynda energetıka, kólik jáne logıstıka, týrızm, mádenıet, densaýlyq saqtaý jáne bilim berý salalarynda eki el arasyndaǵy ózara tıimdi saýda-ekonomıkalyq yntymaqtastyqty tereńdetý, jańa baǵyttarda ózara taýar aınalymyn keńeıtý, hımııa ónerkásibi, mashına jasaý, qurylys, aýyl sharýalyshyǵy salalarynda qazaqstandyq óńdelgen jáne shıkizat ónimderiniń, sondaı-aq qazaqstandyq astyq eksportyn ulǵaıtý máseleleri talqylandy. Eki memlekettiń memlekettik organdary, óńirleri men bıznes qaýymdastyqtary arasyndaǵy ózara is-qımyl máseleleri, grýzın kompanııalarynyń «Astana» halyqaralyq qarjy ortalyǵynyń jumysyna belsendi qatysýy máseleleri qaraldy.
Sondaı-aq, ınvestıtsııalyq yntymaqtastyqty damytý máselesine kóp kóńil bólindi. Sońǵy 12 jylda Grýzııa ekonomıkasyna salynǵan qazaqstandyq ınvestıtsııalardyń kólemi $406 mln-nan asty, Grýzııadan Qazaqstanǵa salynǵan tikeleı ınvestıtsııalardyń jalpy aǵyny $45,9 mln qurady.
Qazaqstandyq kompanııalar «Grýzııa temir joldaryna» elektrovozdar jáne Tbılısıdegi avtobýs parkin jańartýǵa qazaqstandyq avtobýstardy jetkizýge daıyn. Kazakh Export Grýzııaǵa eksporttyq-saqtandyrý baǵdarlamasy boıynsha uzaqmerzimdi saýda qarjylandyrýyn jáne ózara tıimdi jobalardy birlesip júzege asyrýdy usynady.
Aıta keteıik, 2017 jyldyń qorytyndysy boıynsha QR men Grýzııa arasyndaǵy taýar aınalymy 2016 jylmen salystyrǵanda 56,4%-ke artyp, $64,3 mln qurady.
QR-dan Grýzııaǵa eksport kólemi 2017 jyly eki esege ulǵaıyp, $38,4 mln qurady (2016 j. - $19,4 mln). Grýzııadan ákelingen ımport ótken jyly $25,9 mln qurady, bul 2016 jylǵa qaraǵanda 19%-ke joǵary ($21,7 mln). 2018 jyldyń qańtar-aqpan aılarynda taýar aınalymy $8,7 mln qurady, bul ótken jyldyń osyndaı kezeńimen salystyrǵanda 80,2%-ke joǵary ($4,8 mln).
Qazaqstanda sheteldik kapıtalǵa arnalǵan jaǵdaılar jaqsaryp keledi. QR-da grýzın kompanııalaryna Ortalyq Azııa men Qytaı naryqtaryna shyǵý múmkindigi berilýde. Búgingi tańda Qazaqstanda energetıka, kólik, ınnovatsııa, medıtsına sekildi salalarda grýzııalyq kapıtaldyń qatysýymen shamamen 120 birlesken kásiporyn qyzmet etedi. 2018 jylǵy 1 sáýirdegi jaǵdaı boıynsha Qazaqstanda grýzııalyq qatysýmen 236 zańdy tulǵa, bólimsheler men ókildikter tirkelgen, onyń áreket etip turǵany - 123.
