Baqytjan Saǵyntaev: Elimizge sheteldik ınvestıtsııalardyń jańa tolqyny kele jatyr
ASTANA. QazAqparat - Qazaqstan Táýelsizdik alǵaly beri shet memleketterden 300 mlrd teńgege jýyq ınvestıtsııa tartty. Bul týraly Elbasynyń qatysýymen ótip jatqan Úkimettiń keńeıtilgen otyrysynda baıandama jasaǵan QR Premer-Mınıstri Baqytjan Saǵyntaev málim etti, dep habarlaıdy «QazAqparat» HAA tilshisi.
«Sizdiń osy jumysqa kúsh salýyńyzdyń arqasynda Táýelsizdik alǵaly beri memleketimizge shetelden 300 mlrd AQSh dollaryna jýyq ınvestıtsııa tartyldy. Qazaqstan óz aımaǵynda bul kórsetkish boıynsha kóshbasshy bolyp tabylady», - dep atap ótti Úkimet basshysy.
Baqytjan Saǵyntaevtyń aıtýyna qaraǵanda, qazirgi ýaqytta shetelden ınvestıtsııa tartý qurylymy ózgergen.
«Sheteldik ınvestıtsııalardyń 25 paıyzy óndeý ónerkásibine baǵyttalyp otyr. Shıkizattan tys sektorǵa - 50 paıyz. Elimizge sheteldik ınvestıtsııalardyń jańa tolqyny kele jatyr», - dedi ol.
Premer-Mınıstr bul sózin naqty mysaldarmen shegeleı tústi.
«Chevron kompanııasynyń quny 37 mlrd AQSh dollarlyq ınvestıtsııasymen birlesken Teńiz jobasynyń keńeıtilýiniń qazirgi tańda álemde balamasy joq. Qytaı, Reseı, AQSh, Japonııa, Ońtústik Koreıa, Iran, Túrkııa men ózge de memlekettermen ónerkásiptik qýattylyqty damytý boıynsha quny 50 mlrd AQSh dollarlyq Sizdiń kelisimderińizdi júzege asyrý - Úkimettiń baqylaýynda», - dedi Mınıstrler kabınetiniń basshysy.
