Baqytjan Saǵyntaev Elbasy Joldaýyna qatysty birqatar tapsyrmalar júktedi
«Keshe memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýy jarııalandy. Sondyqtan biz búgin Joldaýdaǵy tapsyrmalardy oryndaýǵa jaýapty memlekettik organdardy naqtylap alyp, mańyzdy qujatty iske asyrý úshin qajetti sharalardyń barlyǵyn qabyldaýymyz qajet. Jańa Joldaý Elbasymyz 2017 jyly jarııalaǵan «Qazaqstannyń úshinshi jańǵyrýy» tuǵyrnamasyn ary qaraı damytady. Maqsatymyz ózgerissiz qala bermek. Ol - búkil álemniń jańa tehnologııalyq qurylysqa kóshýi jaǵdaıynda eń damyǵan otyz eldiń qataryna kirý. Memleket basshysynyń tapsyrmasy boıynsha Úkimet elimizdiń 2025 jylǵa deıingi damýynyń strategııalyq josparyn jáne ilgeri basýymyzǵa birqatar baǵdarlamalyq qujattardy daıyndady. Jańa Joldaý atqarýshy bıliktiń aldyna «Tórtinshi ónerkásiptik revolıýtsııa» usynyp otyrǵan jańa múmkindikter men odan keletin qaýip-qaterlerge elimizdiń sátti beıimdelýi úshin osy jyldan qalmaı sheshilýi tıis naqty mindetterdi qoıyp otyr», -dedi B. Saǵyntaev.
Osy oraıda ol Prezıdent óziniń Joldaýynda on negizgi maqsatty belgilegenin jáne olardyń barlyǵy jaqyn bolashaqta júzege asyrylýy qajettigin atap ótti.
«Birinshi basymdyq ındýstrııalandyrý men jańa tehnologııalardy engizýge qatysty. Investıtsııalar jáne damý mınıstrligi múddeli memlekettik organdarmen, uıymdarmen birlese ónim eksporty men tehnologııalar transfertine ekpin qoıa otyryp, otandyq kásiporyndardy jańǵyrtý men tsıfrlandyrýǵa baǵyttalǵan jańa tetikterdi ázirleýi qajet», - dep atap ótti Úkimet basshysy.
Osy oraıda qanatqaqty jobalardy aıqyndap, olardy iske asyrýǵa kirisý júkteldi. Bul baǵyttaǵy jumystarǵa Investıtsııalar jáne damý mınıstri Jeńis Qasymbek jaýapty bolady.
Aqparat jáne kommýnıkatsııalar mınıstrligi tıisti memlekettik organdarmen birge sharalar keshenin daıarlaýy tıis. Tsıfrlyq ári ınnovatsııalyq sheshimderdi daıarlaýdy damytý turǵysyndaǵy sharalarǵa Nazarbaev Ýnıversıteti, «Astana» halyqaralyq qarjy ortalyǵy, IT-startaptar halyqaralyq tehnoparki qamtylmaq. Sonymen qatar bul baǵytta zańnamalyq túzetýlerdi qamtamasyz etý tapsyryldy.
«Alataý» ınnovatsııalyq tehnologııalar parkiniń budan keıingi qyzmeti boıynsha Investıtsııalar jáne damý mınıstrligi Aqparat jáne kommýnıkatsııalar mınıstrligimen, Almaty ákimdigimen eki aptalyq merzimde naqty usynystar engizýi tıis. Investıtsııalar jáne damý mınıstrligine ındýstrııalandyrýdyń úshinshi bes jyldyǵy memlekettik baǵdarlamasynyń jobasyn ázirleýge kirisýi qajet. Osy oraıda tsıfrlyq tehnologııalarǵa ekpin qoıylýy kerek», - dedi B. Saǵyntaev.
