Baqytjan Saǵyntaev Dúnıejúzilik bank pen halyqaralyq qarjy korporatsııasynyń vıtse-prezıdentterimen kezdesti
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev Dúnıejúzilik bank pen Halyqaralyq qarjy korporatsııasynyń vıtse-prezıdentteri Sırıl Mıýllermen jáne Djordjına Beıkermen kezdesý ótkizdi.
Kezdesý barysynda Qazaqstannyń ınvestıtsııalyq ahýalyn odan ári jaqsartýdyń negizgi baǵyttary talqylandy. Atap aıtqanda, aldaǵy bes jylǵa arnalǵan seriktestik strategııasyn damytý, Qazaqstannyń eksporttyq áleýetin keńeıtý, bıznes ahýalyn jáne memlekettik ınstıtýttardy nyǵaıtý, sondaı-aq adam kapıtalyn aıtarlyqtaı kúsheıtý máseleleri qaraldy.
Yntymaqtastyq ornaǵan ýaqyttan beri Dúnıejúzilik bank Qazaqstanǵa 46 jobany qarjylandyrý úshin $8,1 mlrd-tan astam qaryz bergen. Búgingi tańda Dúnıejúzilik banktiń jobalar qorjyny 22 jobadan turady, onyń ishinde 7 aǵymdaǵy joba jáne 15 joba jalpy $4,1 mlrd somasyna seriktestik týraly kelisimder aıasynda iske asyrylýda. Aǵymdaǵy jobalardyń qorjyny $3,2 mlrd somasyna 7 jobany qamtıdy.
