Baqytjan Saǵyntaev dári-dármekke qoljetimdilikti arttyrý sharalary týraly aıtty

ALMATY. QazAqparat – Onlaın brıfıng barysynda Almaty qalasynyń ákimi Baqytjan Saǵyntaev qaladaǵy dári-dármekpen qamtamasyz etýge qatysty jaǵdaıdy túsindirdi, dep habarlaıdy QazAqparat tilshisi.

Baqytjan Saǵyntaev qazirgi ýaqytta suranysqa ıe dári-dármekterdiń qoljetimdi baǵada bolýy qaladaǵy koronavırýstyń jaǵdaıyn turaqtandyrý úshin mańyzdy ekenin atap ótti.

Sonymen qatar, ol paratsetamol, ıbýprofen jáne quramynda paratsetamol bar preparattarǵa suranystyń joǵarylaýyna baılanysty megapolıs dárihanalarynda tapshylyq paıda bolǵanyn aıtty.

«Biz dárilik zattardy óndirýshilermen, iri jetkizýshilermen jáne dıstrıbıýtorlarmen Almaty qalasynyń dárihanalaryna dári-dármekterdi úzdiksiz jetkizý týraly kelisimge qol jetkizdik. Ol úshin farmatsevtıkalyq kompanııalarmen kelisimge qol qoıylyp, 105 dárihananyń tizimi anyqtaldy (6 shilde kúni 2 dárihana qosyldy), olarǵa basym tártippen dári - dármekter jetkiziletin bolady», - dedi Baqytjan Saǵyntaev.

Sonymen qatar, kelisimde dárihanalardyń baǵany kótermeýi jáne bir ataýdaǵy dári-dármekti bir qolǵa 3 danadan artyq bermeý mindettilgen.

«5 shildedegi jaǵdaı boıynsha qalanyń dárihanalaryna 115 myń paratsetamol, 30 myń termometr, 20 myń ıbýprofen, 35 myń ıngavırın jáne basqa dári-dármekter jóneltildi. 6 shilde kúni tańerteńnen bastap qosymsha 150 myń paratsetamol men 50 myń termometrdi tıeý jumystary júrgizilýde. 8 jáne 12 shildede qosymsha 80 myń jáne 850 myń paratsetamol jetkiziledi», - dedi ákim.