Baqytjan Saǵyntaev «Citic Group» dırektorlar keńesiniń tóraǵasymen kezdesti
ASTANA. QazAqparat - Qazaqstan Respýblıkasynyń Premer-Mınıstri Baqytjan Saǵyntaev Dırektorlar keńesiniń tóraǵasy Chan Chjenmın basshylyq etken «Citic Group» korporatsııasynyń ókilderimen kezdesý ótkizdi, dep habarlaıdy QR Úkimetiniń baspasóz qyzmeti.
Kezdesý barysynda birlesken ınvestıtsııalyq jobalardy iske asyrý men «Nurly jol» baǵdarlamasy aıasynda Qazaqstannyń ınfraqurylymdyq damýyna qytaı korporatsııasynyń odan ári qatysýy týraly máseleler talqylandy.
Kezdesý qorytyndysy boıynsha aýyl sharýashylyǵyn, qarjy, energetıka salasyn, medıtsınany damytý salasyndaǵy yntymaqtastyq týraly qujattarǵa qol qoıyldy, sonymen qatar «CITIC Construction» kompanııasyna respýblıkalyq mańyzǵa ıe «Taldyqorǵan-Qalbataý-Óskemen» avtokólik jolynyń bir bóligin jóndeý jobasy boıynsha talaptarǵa sáıkes kelý týraly sertıfıkat tabystaldy.
CITIC korporatsııasy - Qytaıdyń iri memlekettik ınvestıtsııalyq korporatsııalarynyń biri. 1979 jyly negizi qalanǵan. «CITIC Construction» - enshiles qurylys kompanııasy. Kompanııanyń eń iri jobalarynyń ishinde Beıjińdegi Olımpıada-2008 basty stadıony - «Qus uıasynyń» qurylysy.
