Baqytjan Saǵyntaev Bostandyq aýdanynyń turǵyndarymen kezdesti
Kezdesý ádettegideı «erkin mıkrofon» qaǵıdatymen ótti. Bul - aýdan turǵyndarymen ekinshi ret júzdesý tsıkly, munda shaǵymdar tyńdalady jáne tıisti sheshimder qabyldanady. Buǵan deıin qala basshysy Alataý, Naýryzbaı, Túrksib, Jetisý, Áýezov, Medeý, Almaly aýdandarynyń turǵyndarymen kezdesken.
Bostandyq aýdanyndaǵy kezdesýge shamamen 500 adam jınaldy. Alǵashqy kezdesýge 600 turǵyn qatysyp, túrli másele boıynsha 120-ǵa jýyq suraq qoıǵan edi. Olardyń qalaı sheshilgeni týraly Bostandyq aýdanynyń ákimi Altaı Rahymbetov baıandady.
Nurlytaý, Ermensaı, Nur-Alataý, Aqtóbe yqshamaýdandarynda 2,8 myńnan astam úı bar, onda 15 myńnan astam adam turady. Turǵyndardy taza aýyz sýmen qamtamasyz etý úshin qazirgi kezde táýligine 9 myń tekshe metr sý shyǵaratyn sý torabynyń jobalyq-smetalyq qujaty ázirlenýde.
Kókshoqy yqshamaýdanynda bıyl 2,8 sharshy metr sý qubyry men 3,7 sharshy metr káriz jelisi tartyldy, sonyń arqasynda atalǵan eldi meken aýyz sýmen turaqty qamtamasyz etilýde.
Sonymen qatar, 53 kóshege 22 sharshy metr syrtqy jaryq jelileri tartyldy. 60 aýla abattandyryldy. Keler jyly 154 kóshege jaryq tartý kózdelgen.
Medıtsınalyq qyzmettiń sapasyn jaqsartý úshin Almaty onkologııalyq ortalyǵy ǵımaraty janynan zamanaýı medıtsınalyq qondyrǵylarmen jabdyqtalǵan qosalqy nysannyń qurylysy aıaqtaldy, munda statsıonar men radıologııalyq zerthana ornalasqan. Sonymen qatar, qalalyq psıhıkalyq densaýlyq ortalyǵy janynan 150 oryndy qosalqy nysan paıdalanýǵa berildi.
Aıta ketý kerek, Almaty ákimi Baqytjan Saǵyntaev barlyq segiz aýdannyń turǵyndarymen ekinshi ret júzdesti. Oǵan 3800 qala turǵyny qatysty. Kezdesý barysynda shahar basshysyna 800-ge jýyq suraq qoıyldy. Kezdesýler qorytyndysy boıynsha aıtylǵan problemalardy sheshý úshin arnaıy is-sharalar jospary bekitiledi.
Abattandyrý, kommýnaldyq jáne ınfraqurylym máseleleri sheshilýde. Turǵyndar ótinishiniń arqasynda qala bıýdjetiniń tarmaqtary qaıta qaraldy, syrtqy jaryq jelileriniń qondyrǵylaryna qarjy bólindi. Sonymen qatar, qalaǵa jańadan qosylǵan eldi mekender turǵyndaryn taza aýyz sýmen qamtamasyz etý, júzdegen shaqyrym jańa joldar salý, aýlalardy abattandyrý mindetteri oryndalatyn bolady.
