Baqytjan Saǵyntaev: Bıyl dári-dármek tapshylyǵy bolmaıdy

ALMATY. QazAqparat - Almatyda medıtsınalyq zattar men dári-dármekten tapshylyq bolmaıdy. Bul týraly onlaın brıfıng barysynda Almaty qalasynyń ákimi Baqytjan Saǵyntaev aıtty, dep habarlaıdy QazAqparat tilshisi.

«Ótken jyly biz dári-dármek qoryn qurdyq. Keıin Úkimet ózge óńirlerge de sondaı qor qurýdy tapsyrdy. Bastapqyda biz qorǵa 10 mlrd teńge bóldik. Onyń 5 mlrd dárihanaǵa, 5 mlrd teńgesi statsıonarǵa dep bólindi. Keıin «SQ-Farmatsııanyń» jumysy durys jolǵa qoıylyp, olar bizdiń statsıonardyń barlyǵyn tolyqtaı dári-dármekpen qamtamasyz etetin boldy. Sondyqtan statsıonarǵa dep bólgen 5 mlrd teńgeni qaıta aldyq. Qazir bul qordy dárihanalardaǵy dárilerdiń mólsherin qajetti deńgeıde qamtamasyz etý úshin ustap otyrmyz. Qor aıasynda 48 mln dana dári alyndy. Onyń jartysy satyldy. Qazir 8 mln dáriden túsirmeı ustap otyrmyz»,-dedi Saǵyntaev.

Qala ákimi jaqynda dári-dármek satatyn uıym basshylarymen kezdeskenin aıtty. Almatyda qazir dári-dármek tapshylyǵy joq. Degenmen naýryz aıynyń basymen salystyrǵanda qazir dári aınalymy 10-15 paıyzǵa artqan.

Sonymen qatar, ol qalada maska da jetkilikti ekenin tilge tıek etti. Jetkizýshi merdigerlerde qazir 30 mln maska bar. Kompanııalar aptasyna 1 mıllıon maska óndiredi.

«Jedel járdem qyzmetine jańa kólikter aldyq, oǵan qosa MRT, KT, IVL jáne basqa da tekserý apparattary jetkilikti deńgeıde.Sondaı-aq kadr máselesi de sheshilgen, sondyqtan alańdaýǵa negiz joq»,- shahar basshysy.