Baqytjan Saǵyntaev Baıqońyr ǵarysh aılaǵy men qalasynyń damý nátıjesimen tanysty
ASTANA. QazAqparat - QR Premer-Mınıstri Baqytjan Saǵyntaev Qyzylorda oblysyna jumys sapary barysynda «Baıqońyr» ǵarysh aılaǵynyń mysaly negizinde elimizdiń ǵarysh salasynyń damýymen, sondaı-aq Baıqońyr qalasyn odan ári kórkeıtý josparymen tanysty, dep habarlaıdy primeminister.kz.
Baqytjan Saǵyntaevqa nysandy aralaý kezinde ǵarysh salasyn damytýdyń qazirgi jaǵdaıy men aldaǵy josparlar, sonymen qatar «Baıqońyr» keshenindegi yntymaqtastyq týraly tujyrymdamany iske asyrý barysy, onyń ishinde ınvestıtsııalardy tartý boıynsha atqarylyp jatqan jumystar týraly baıandaldy.
QR Qorǵanys jáne aeroǵarysh ónerkásibi vıtse-mınıstri M. Nurǵojın jáne «Rosǵarysh» memlekettik korporatsııasynyń bas dırektorynyń orynbasary A. Mazýrın «Baıqońyr» ǵarysh aılaǵyn odan ári damytý josparymen tanystyrdy.
Óz kezeginde, Qyzylorda oblysy ákiminiń orynbasary S. Qojanııazov pen qala ákimshiliginiń basshysy K. Býsygın Baıqońyrdy uzaqmerzimdi damytýdyń birlesken baǵdarlamasyn oryndaý týraly aıtyp berdi. Qazirgi tańda qalany tabıǵı gazben qamtamasyz etý jáne turǵyn úı qurylysy jumystary bastalǵan, sýmen jabdyqtaý jáne sý tartý júıelerin rekonstrýktsııalaý jáne jańǵyrtýdyń daıyndyq jumystary júrgizilip, áleýmettik máselelerdi sheshý boıynsha sharalar qabyldanyp jatyr.
Eske sala keteıik, Baqytjan Saǵyntaev Elbasy tapsyrmasy boıynsha keshe jumys saparymen Ońtústik Qazaqstan oblysyna bardy. Sapardyń maqsaty - Prezıdent Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýlary men Bes áleýmettik bastamasy aıasynda bergen tapsyrmalarynyń júzege asyrylý barysymen tanysý. Búgin Premer-Mınıstrdiń Qyzylorda oblysyna jumys sapary aıaqtaldy.
