Baqytjan Saǵyntaev bas dárigerlermen COVID-19 qarsy kúres máselelerin talqylady
ALMATY. QazAqparat – Almaty qalasynyń ákimi Baqytjan Saǵyntaev 70-ten astam medıtsınalyq uıymdardyń bas dárigerlerimen koronavırýs indetine qarsy júıeli sanıtarlyq-epıdemıologııalyq jumysty qurý jóninde onlaın jıyn ótkizdi, dep habarlaıdy QazAqparat tilshisi.
«Barlyq kúsh koronavırýstyq ınfektsııamen kúreske jumyldyrylǵan. Birinshi basymdyq – halyqty qorǵaý. Ol úshin qaladaǵy barlyq sala tartyldy. Eń aldymen bizdiń dárigerler, emhanalar men uıymdar tarapynan qajetti talaptar oryndalyp jatyr. Basty másele – búkil qala boıynsha koronavırýstyq ınfektsııanyń taralýyna jol bermeý», - dedi Baqytjan Saǵyntaev.
Sonymen qatar, ol bas dárigerlerdi ashyq dıalogqa shaqyryp, ózekti máselelerdi talqylaýdy jáne olardy jedel sheshý úshin qajetti sharalardy birlesip atqarý kerektigin aıtty.
Onlaın jıyn barysynda jeke qorǵanys quraldarymen qamtamasyz etý, ınfektsııalyq statsıonarlarda dárigerlerdiń jáne barlyq sanattaǵy medıtsınalyq qyzmetkerlerdiń qaýipsizdigi úshin qajetti sanıtarlyq-epıdemıologııalyq normalardy saqtaý, medıtsınalyq qyzmetkerlerge ústemeaqy tóleý, turǵyn úı jaǵdaılary jáne naýqastarmen jumys isteıtin barlyq medıtsınalyq qyzmetkerlerdi tamaqtandyrý, sonymen qatar turǵyndardyń COVID-19 testine tapsyrý máseleleri qarastyryldy.
Atqarylǵan jumystar jaıly qalalyq Qoǵamdyq densaýlyq basqarmasynyń basshysy T.Ábildaev jáne Taýarlar men qyzmetterdiń sapasy men qaýipsizdigin baqylaý departamentiniń basshysy A.Moldaǵasymova baıandady. Óz kezeginde medıtsınalyq qoǵamdastyq ókilderiniń atynan №1 qalalyq klınıkalyq aýrýhananyń bas dárigeri E. Qalıev sóz sóıledi.
Búgingi tańda Almaty qalasynda 21 370 adam COVID-19-ǵa tekserýden ótti. Zerthanalyq túrde rastalǵan koronavırýstyq ınfektsııa juqtyrǵan 350 jaǵdaı tirkeldi. Juqpaly aýrýhanalarda 299 naýqas em alyp jatsa, provızorlyq ortalyqtarda 256 adam, karantındik oqshaýlaýda — 366, úı karantıninde — 7097 adam bar. Medıtsınalyq uıymdar barlyq jeke qorǵanys quraldarymen, onyń ishinde 4500-den astam birneshe ret paıdalanýǵa jaramdy qorǵanys medıtsınalyq kostıýmderimen qamtamasyz etilgen.
QR Prezıdentiniń tapsyrmasy boıynsha, Almaty qalasynda koronavırýspen kúreske jumyldyrylǵan densaýlyq saqtaý uıymdary qyzmetkerleriniń ústemeaqysynyń 99% tólendi. Qalǵan eki karantındik uıym mamandarynyń ústemeaqysyn tóleý boıynsha jumystar júrgizilýde.
Tótenshe jaǵdaı kezinde medıtsına qyzmetkerleri ózderiniń talap-tilekterine sáıkes qonaqúılerge, hostelder men jataqhanalarǵa, sondaı-aq týysqandarynyń úılerine ornalastyryldy. Sonymen qatar qonaqúılerde turýǵa nıet bildirýshiler úshin de qosymsha jatyn oryndar bar. Bul rette turý jáne tamaqtanýǵa arnalǵan shyǵyndar jergilikti bıýdjet qarajaty esebinen jabylatyn bolady.
Budan ózge jıyn barysynda tótenshe jaǵdaıdyń 1 mamyrǵa deıin uzartylǵany jáne 20 sáýirden bastap ónerkásip jáne qurylys kásiporyndary, qyzmet kórsetý salasynyń belgili bir sektorlarynyń jumysyn iske qosýdy eskere otyryp, koronavırýstyq ınfektsııany taratpaý boıynsha sanıtarlyq-epıdemıologııalyq normalardyń odan ári saqtalýyn qamtamasyz etý jónindegi sharalar qaraldy.
Sondaı-aq jańa modýldik juqpaly aýrýlar aýrýhanasynyń jumysyn jolǵa qoıý máselesi sóz boldy. ıAǵnı, aýrýhanaǵa medıtsınalyq qyzmetkerlerdi tartý jáne onyń tehnıkalyq quraldarmen jabdyqtalýyna erekshe kóńil bólý.
Megapolıs ákimi kezdesýdi qorytyndylaı kele, COVID-19 indetimen kúres jolynda júrgen barlyq mamandarǵa tártip pen sanıtarlyq-epıdemıologııalyq normalardy qatań saqtaý kerektigin atap ótti.
«Baýyrjan Momyshulynyń sózi bar «Tártipsiz el bolmaıdy, tártipke bas ıgen qul bolmaıdy». Bir jaǵadan bas, bir jeńnen qol shyǵara otyryp, jumyla jumys isteý qajet. Ásirese, dál búgingideı syn shaqta árbir jumys ornynda qatań tártip kerek», - dedi Baqytjan Saǵyntaev.
Sondaı-aq, ol ákimdik, quqyq qorǵaý qyzmeti, áskerı qyzmetshiler de qalanyń epıdemıologııalyq qaýipsizdigin qamtamasyz etý maqsatynda jan-jaqty qoldaý kórsetetinin tilge tıek etti.
