Baqytjan Saǵyntaev áıelderge jańa aýdanda bıznes ashýǵa keńes berdi
ALMATY. QazAqparat – Almaty ákimi Baqytjan Saǵyntaev «Woman in business» kásipkerlik forýmynda áıelderdi bıznespen aınalysýǵa shaqyrdy, dep habarlaıdy QazAqparat tilshisi.
«Ózderińiz bilesizder elimizde jınalatyn salyq túsiminiń 25%-y Almatydan túsedi. Shaǵyn jáne orta kásipkerliktiń 60%-y osynda. Sondyqtan ShOB sýbektilerin qoldaýǵa jumys jasaımyz. «ÁKK» AQ sheńberinde arnaıy qarjylyq uıymdar quryldy. Qarajat bóldik. Byltyr buǵan 1 mlrd teńge bólinse, bıyl 30 mlrd teńge bólinedi. ShOB sýbektilerine nesıe 2-7%-ben berilmek. Eger sizdiń kásibińiz tómengi Almaty jaqta bolsa, sizge paıyzdyq mólsherleme 2%, al joǵarǵy jaǵynda bolsa paıyzdyq mólsherleme 7 % bolmaq», - dedi ol.
Onyń aıtýynsha, «Baqytty otbasy» baǵdarlamasy aıasynda «Іsker ana» jobasy iske qosylǵan.
«Ár aýdanda belsendi áıelder bar. Solardyń múmkindigin ashý úshin biz osy baǵdarlamany qostyq. Olarǵa grant bólip, qural-jabdyq alyp berip jatyrmyz. 1 myńnan astam ana kómek aldy. Olardy oqytyp, zań turǵysynan kómek berip jatyrmyz», - dedi ákim.
«Turǵyn úı qurylys jınaq banki» AQ basqarma tóraıymy Lázzat Ibragımova kásipker áıelderdi qurylys jáne ónerkásip salasyna shaqyrdy. Onyń aıtýynsha, qazir áıelderdiń kópshiligi bilim berý, densaýlyq saqtaý, saýda salasynda júr.
Al memlekettik qoldaý kóbinese qurylys salasyna beriledi.
«Meniń oıymsha, áıelder qurylys salasyna da kerek. Áıelder tek bıznes basqarýshy ǵana emes, bıznes ıesi bolsa eken deımiz. Eń bastysy áıelde úsh nárse: bilim, jeke baspanasy, depozıtinde qarjysy bolsa boldy», - dedi Lázzat Ibragımova.
«Jáne jaqsy kúıeý kerek», - dedi ázildedi ákim.
Aıta ketý kerek, búgin Almatyda «Women in business» áıelder kásipkerliginiń ekinshi forýmy ótken bolatyn.
