Baqytjan Saǵyntaev aýyl sharýashylyǵy men qurylys salalaryna qatysty tapsyrma berdi
ASTANA. QazAqparat - QR Premer-Mınıstri Baqytjan Saǵyntaev qańtar-tamyzdaǵy áleýmettik-ekonomıkalyq damýdyń qorytyndysy aıasynda birqatar tapsyrmalardy júktedi, dep habarlaıdy QazAqparat.
«Tutastaı alǵanda, statıstıkalyq málimetterden kórip otyrǵanymyzdaı nátıje jaman emes. Biraq bul nátıjeler arqyly bosańsýǵa bolmaıdy. Osy oraıda júıelik sharalardy iske asyrýdy jalǵastyrý qajet. Atap aıtqanda, bizde ósý qarqynynyń báseńdeýi qurylysta jáne aýyl sharýashylyǵynda baıqalyp otyr. Ósimdi sharýashylyǵynda jınalatyn ónim byltyrǵa qaraǵanda tómendeý bolatynyn kórip otyrmyz, bul turǵyda sáıkesinshe kórsetishter tómendeıdi. Alaıda onyń ornyn mal sharýashylyǵy esebinen toltyrý kerek»,-dep tapsyrdy Úkimet basshysy.
Sonymen qatar Premer-Mınıstr qurylys salasynda kórsetkishteri báseńdegen óńirlerge tıisti tapsyrma berdi.
«Qurylys máselesine toqtalatyn bolsaq, bizde Qaraǵandy, Soltústik Qazaqstan, Almaty, Mańǵystaý, Qyzylorda oblystary qalyp kele jatyr. Jartyjyldyq qorytyndysy boıynsha oblys ákimderimen telefon arqyly sóıleskende, olar jaǵdaı túzeletinin alǵa tartqan edi. Alaıda ahýal sol qalpynda. Endi qalǵan ýaqytta jaǵdaıdy túzetesizder dep oılaımyn. «Nurly jol» memlekettik baǵdarlamasy boıynsha baǵyttalǵan qarjy tolyqtaı ıgerilýi tıis. Memleket basshysy jyl sońynda ońtaıly kórsetkishpen shyǵý maqsatyn júktedi, sondyqtan barshamyz bul tapsyrmany oryndaýymyz qajet»,-dedi Baqytjan Saǵyntaev.
Budanburyn habarlaǵandaı , 2017 jylǵy qańtar-tamyzdaǵy áleýmettik-ekonomıkalyq damýdyń qorytyndysyna qatysty QR Ulttyq ekonomıka birinshi vıtse-mınıstri Rýslan Dálenov baıandama jasaǵan bolatyn.
Onyń atap ótýinshe, ósýdiń joǵary serpini alty bazalyq salanyń tórteýi boıynsha (ónerkásip, saýda, kólik jáne qoımalaý, aqparat jáne baılanys) baıqalýda, ósý qarqynynyń báseńdeýi qurylysta jáne aýyl sharýashylyǵynda oryn aldy.
