Baqytjan Saǵyntaev Áýezov aýdanynyń ákimine eskertý jasady
ALMATY. QazAqparat - Baqytjan Saǵyntaev qala aýdandarynyń áleýmettik-ekonomıkalyq jaǵdaıymen tanysýdy jalǵastyrýda, dep habarlaıdy QazAqparat tilshisi.
Ákim keshegi sapar barysynda qala basshysy kólik jáne kommýnaldyq ınfraqurylymnyń jaı-kúıimen tanysyp, aýdannyń áleýmettik mańyzy bar nysandaryn aralap kórdi. Megapolıs ákimine Almaty kólik holdıngi iske asyrǵan elektrondyq bıletteýdiń ınnovatsııalyq júıesi týraly aqparat berdi. Qala ákimi kásiporyn basshylyǵyna atalmysh júıeni jetildire túsýdi tapsyrdy. Sondaı-aq, Baqytjan Saǵyntaev «Mamyr-4» shaǵyn aýdanynyń turǵyndarymen kezdesip, máselelerine qulaq asty.
«Áýezov aýdanynyń ákimi Ánýar Óskenbaevqa aldaǵy ýaqytta maǵan ádemi aýdannyń ádemi jerlerin ǵana kórsete bermeı, jaǵdaıdy obektıvti túsiný úshin problemaly jerlerdi de kórsetýdi tapsyrdym. Jalpy, aýdanda kósheni jaryqtandyrý máselesin keshiktirmeı sheshý qajet. Jol tóseminiń, jylý, sý qubyry jáne káriz jelileriniń tozǵany kózge uryp tur. Aýlalardy abattandyrý kezinde turǵyndardyń pikirin eskerý qajet», - dep jazdy Baqytjan Saǵyntaev Facebook paraqshasynda.
Ol óz postynda Dostyq shaǵyn aýdanynyń 18 kóshesinde syrtqy jaryqtandyrý jelilerin júrgizip, 12 kóshede káriz jelilerin salý kerektigin, 79 úıdiń jylý qazandyqtaryn, sý qubyrlaryn jáne joldardy jóndeý qajet ekenin jazdy. Almaty ákimi Abaı dańǵyly men Baýyrjan Momyshuly kóshesiniń qıylysynda ornalasqan «Dostyq» metro stansasynyń qurylysyn tekserdi. Uzyndyǵy 3 shaqyrym bolatyn «Dostyq» jáne «Saryarqa» stansalary jolaýshylar aǵynyn 56% - ǵa deıin arttyrady dep kútilýde.
