Baqytjan Saǵyntaev Almatynyń jeńimpaz oqýshylaryn quttyqtady
ALMATY. QazAqparat - Almaty ákimi Baqytjan Saǵyntaev oqýshylardyń «Almaty daryny» erekshe tósbelgisin belgileý jónindegi usynysyn qoldaıtynyn aıtty, dep habarlaıdy QazAqparat tilshisi.
«Búgin halyqaralyq jáne respýblıkalyq olımpıadalar men konkýrstardyń jeńimpazy atanǵan almatylyq oqýshylardy quttyqtadym. Olardyń jeńisi - balalardyń eren eńbeginiń nátıjesi, olardyń boıyndaǵy erekshe daryndy ashqan jáne ony durys baǵytqa bura bilgen ata-analar men pedagogtardyń eńbegi»,- dep jazdy Baqytjan Saǵyntaev óziniń Instagram-daǵy paraqshasynda.
Onyń aıtýynsha, bıylǵy jyly 352 oqýshy 28 zııatkerlik jáne shyǵarmashylyq saıystyń jeńimpazy atandy. Olardyń qorjynynda 90 altyn, 124 kúmis, 138 qola medal bar.
«Bizdiń balalarymyz 11-synyp oqýshylary arasyndaǵy prezıdenttik olımpıadada, ǵylymı jobalar boıynsha ótken respýblıkalyq baıqaýlarda jáne jalpy pándik olımpıadada komandalyq birinshi oryndy ıelenip júr»,-dep jazdy ákim.
Baqytjan Saǵyntaev oqýshylardyń «Almaty daryny» erekshe tósbelgisin belgileý jónindegi usynysyna qoldaý bildirdi. Tósbelginiń dızaınyn balalardyń ózderi jasaıdy. Tósbelgi oqý jyly aıaqtalǵanda oqýshylarǵa tapsyrylady.
