Baqytjan Saǵyntaev Almatynyń tarıhı ortalyǵynda qurylys toqtaıtynyn aıtty

ALMATY. QazAqparat - Baqytjan Saǵyntaev «Almaty» telearnasyndaǵy Akimat Live baǵdarlamasynda qala qurylysyn retteıtin jańa erejeler ázirlenetinin málim etti, dep habarlady QazAqparat tilshisi.

Onyń aıtýynsha, erejelerdiń basty maqsaty — qoǵam men bıznes múddelerin eskeretin júıeli sheshim qabyldaý.

Erejede jer ýchaskelerin ıgerý, onyń ishinde buǵan deıin alynǵan oń sheshimder men ruqsat qujattardy durys paıdalaný qarastyrylǵan.

Erejeniń negizgi tarmaqtary qalany damytýǵa arnalǵan qala qurylysy talaptaryn bekitýge baǵyttalatyn bolady.

Sonymen qatar, tarıhı qalyptasqan ǵımarattardy saqtaý jáne osy aımaqtarda qurylysty retke keltirý (aımaqtandyrý) maqsatynda erekshe qala qurylysyn aımaǵy belgilenedi.

Munda tarıhı ortalyqtyń shekaralaryn anyqtaý mańyzdy. Sondaı-aq, qalanyń basqa aýdandaryndaǵy jekelegen aımaqtar da erejede qarastyrylǵan.

«Qala qurylysyn erekshe retteý aımaqtarynda ǵımarattardyń tyǵyzdyǵy men bıiktigi eskeriletin bolady. Mysaly, jańa ǵımarattyń bıiktigi irgeles salynǵan nysannan 1/3 bıik bolmaýy tıis. Budan ózge, erejelerde aeratsııa rejımin jaqsartý, kógaldandyrý, qalalyq ortany saqtaý men jaılylyǵyn arttyrý talaptary jazylady. Tarıhı kelbetti saqtaý úshin ǵımarattar men qurylystardyń qasbetterine qoıylatyn talaptar da eskeriledi. Qala turǵyndaryn, qoǵam belsendiler men sarapshylardy keńinen tarta otyryp, qoǵamdyq talqylaý ótkizý tetikterin ázirleý mańyzdy»,- dedi ákim.

Júrgizilgen saraptama jáne turǵyndardyń pikirin jınaqtaý barysynda tarıhı ortalyq aýmaǵynda 36 jer teliminiń jeke menshikte ekeni anyqtaldy.

Bul ýchaskeler eki topqa bólindi: qurylys bastalǵan jáne bos jatqan jerler. 14 ýchaskede qurylys bastalǵan, onyń ishinde 3 nysannyń qurylysy toqtady ári ruqsat qujattary qaıtaryldy.

Turǵyndardyń ótinishi boıynsha 11 nysanǵa usynym berildi, munda qozǵalys syzbasyn uıymdastyrý, abattandyrý, qabattar sany jáne taǵy basqa máseleler eskeriletin bolady.

«Bos jatqan jer telimderi boıynsha, onyń ishinde 8 ýchaskeni qaıtarý (satyp alý) qarastyrylýda, munda abattandyrylǵan jáne kógaldandyrylǵan qoǵamdyq keńistikter qurylatyn bolady. 14 ýchaskege jasyl jelekterdi kesýge tyıym salý, burynnan bar nysandardy eskere otyryp, qabattar sanyn jáne fýnktsıonaldy paıdalanýdy azaıtý boıynsha qala qurylysyn júrgizýge shekteý qoıyldy»,- dep atap ótti qala basshysy.