Baqytjan Saǵyntaev: Almatyny damytý úshin saýdany kóleńke naryqtan shyǵarý kerek
ALMATY. QazAqparat – Baqytjan Saǵyntaev qala bıýdjetiniń 40%-ǵa jýyǵy saýda esebinen qalyptasatynyn jáne megapolıstiń qarqyndy damýy úshin ekonomıkanyń osy sektoryn kóleńkeden shyǵarý qajet ekenin aıtty, habarlaıdy QazAqparat tilshisi.
«Ol úshin ne isteý kerek? Sýpermarket, onlaın saýda men úıdiń qasyndaǵy dúkenderge qolaıly jaǵdaı jasap, qoldaý kórsetilýi tıis», - dep jazdy qala ákimi Instagram -daǵy paraqshasynda.
Saǵyntaev jergilikti franchaızıngti tarta otyryp, «úıdiń qasyndaǵy dúken» sekildi tıptik jobalardyń iske asýyna qajetti qoldaý kórsetiletinin atap ótti. Mysaly úlgi retinde álemdik 7-Eleven modeli boıynsha qurylǵan Froot jelisin aıtýǵa bolady.
«Aıta keterligi, jańa úlgidegi Froot dúkender jelisindegi azyq-túlikterdiń baǵasy úıdiń qasyndaǵy basqa dúkenderden 10-15%-ǵa tómen. Munda barlyq is-qımyldy, taýar assortımentinen bastap onyń sanyna deıingi úrdisterdi, kassa men býhgalterııany zııatkerlik júıe basqarady. Mundaı dúkenderdiń jumysy barynsha ashyq ári bıýdjetke salyq pen túrli tólemder ýaqytyly túsedi, qyzmetkerler aı saıyn turaqty jalaqy alady», - dep atap ótti ol.
