Baqytjan Saǵyntaev almatylyqtarǵa qalyń qarǵa baılanysty saq bolýdy eskertti
ALMATY. QazAqparat - Almaty ákimi Baqytjan Saǵyntaev qardyń mol jaýýyna oraı qala turǵyndaryna úndeý jarııalady, dep habarlaıdy QazAqparat tilshisi.
«Qurmetti almatylyqtar! Qardyń qalyń jaýýy óte saq bolýdy talap etedi. Qar jamylǵysynyń bıiktigi qalanyń joǵarǵy bóliginde - 15 sm, taýly aımaqta 25 sm-den asty. Aýyr qar aǵashtardy qulatty. Aǵashtardyń qulaǵan keıbir butaqtary kólikterge tıgen.
Tańerteń qalany aralap shyqtym. Kóshelerdi, aıaldamalardy qardan tazalaý boıynsha jáne taıǵaqqa qarsy barlyq qajetti sharalar qolǵa alynýda. Jol boıynda 600 tehnıka men 1700 jumysshy qyzmet etýde», - dep jazdy qala ákimi Instagram-paraqshasynda.
Almaty basshysy Polıtsııa departamentine joldaǵy qaýipsizdikti qamtamasyz etý sharalaryn kúsheıtýdi, Tótenshe jaǵdaılar departamenti men kommýnaldyq qyzmetterge apattyq jaǵdaılardyń saldaryn dereý joıyp otyrýdy tapsyrdy.
«Kóshelerdi qardan tazalaý boıynsha qandaı jerlerde qıyn jaǵdaı týyndap otyrǵanyn habarlaýdy suraımyn. Qurmetti almatylyqtar! Úlken jáne Kishi Almaty ózenderi basseınderiniń taý bókterlerinde qar kóshkini júrý qaýpi bar. Sondyqtan taýda óte saq bolýlaryńyzdy, tipti taýǵa barýdy keıinge shegerýdi suraımyn», - dep jazdy Baqytjan Saǵyntaev.
Eske sala ketsek, 16 aqpan kúni túngi saǵat úshten bastap Almatyda qar jaýyp, sońy qarǵa ulasty. Molynan jaýǵan qardan aǵashtar qulap, kólikterdi zaqymdady.
