Baqytjan Saǵyntaev almatylyqtardy Jańa jylmen quttyqtady
ALMATY. QazAqparat – Almaty ákimi Baqytjan Saǵyntaev Instagram paraqshasynda almatylyqtar men qala qonaqtaryna Jańa jylmen quttyqtady, dep habarlaıdy QazAqparat tilshisi.
«Bizdiń súıikti qalamyz — Almatyda aldaǵy Jańa jyldy qýanyshpen jáne úlken úmitpen qarsy alamyz. Osynaý jarqyn mereke bizge qasymyzdaǵy týǵandarymyzben, dostarymyzben birge jylylyq syılaıdy» – dep jazdy qala ákimi.
Sonymen qatar, ol ótip bara jatqan jyly ómirimizdiń barlyq salasynda oń ózgeristerdi nyǵaıtý úshin bárin jasaǵanyn tilge tıek etti.
«Ótip bara jatqan jyly biz ómirimizdiń barlyq salasynda oń ózgeristerdi nyǵaıtý úshin bárin jasadyq. Biz jıi ári ashyq júzdestik. Bárimiz úshin birdeı múmkindigi bar Jańa Almatyny qurý úshin mańyzdy qadamdardy júzege asyrdyq. Úmit pen úlken jetistikter qalasyn qalyptastyrdyq.
Qurmetti dostar! Biz — naǵyz almatylyq minezdiń ıesimiz. Ashyq, eńbeksúıgish, meıirimdi jáne batyl bola alamyz. Árıne, eger másele súıikti qalamyzdyń taǵdyryna qatysty bolsa. Jaqyn arada Jańa 2020 jyl úıimizge enedi. Ony qarsy ala otyryp, biz eń jaqyn adamdarymyz týraly oılaımyz. Olarǵa nazar aýdaramyz jáne qamqorlyqqa bóleımiz.
Kele jatqan jańa jylda ár otbasynda beıbitshilik pen baıandy baqyt saltanat qursyn. Barlyq izgi úmitter men armandar oryndalsyn! Barlyǵyńyzǵa shyn júrekten densaýlyq pen gúldený tileımin. Jańa jyl qutty bolsyn!» – dep jazdy Baqytjan Saǵyntaev.
