Baqytjan Saǵyntaev Almatydaǵy qoǵamdyq kólikpen baılanysty problemalardy aıtty
ALMATY. QazAqparat – Almaty ákimi Baqytjan Saǵyntaev qaladaǵy qoǵamdyq kólikpen baılanysty qalyptasqan máseleler týraly aıtty. Bul týraly ákim óziniń Facebook-tegi paraqshasynda bólisti, dep habarlaıdy QazAqparat.
Búgin ákimdikte qoǵamdyq kólik salasynyń jumysyn jete qaradyq. Naqtyly jumystar júrýde. Jyljymaly sostavtyń avtobýs parki jańarýda. Jolaıryqtaryn salý jalǵasýda. Degenmen, sheshimin kútken máseleler bar.
Birinshiden, avtobýs parkteri úshin bilikti kadrlar — júrgizýshiler, servısti mamandar, ıaǵnı slesarlar men mehanıkter jáne basqalary jetispeıdi. Olardy daıarlaýdyń júıesi joq. Qalalyq mobıldilik (Telibaevqa) jáne bilim (Qojabergenova) basqarmalaryna bilikti kadrlar daıyndaýdyń naqtyly sharalaryn jasaýdy tapsyrdym. Bul jumysty kadrlar qajettiligine boljam jasap ýaqytyly ári kolledjderdiń oqý josparyna saı júrgizgen jón. Apta ishinde Telibaev bul protsessti uıymdastyrýdyń naqtyly mehanızmin usynýy tıis.
Ekinshiden, ekologııalyq taza kólik — Almatynyń trolleıbýs jelisi durys baǵalanbaı keledi. Bulardaǵy baılanys jelileri tozǵan, kún saıyn úzilip jatady. Ákimdikke qalanyń barlyq trolleıbýs jelisin jóndeýdi tapsyrdym. Bıylǵy jyldyń ózinde Tımırıazev kóshesi boıyndaǵy barlyq 5,1 km jeli aýystyrylady. Qajetti qarjyny bólemiz. Jańa trolleıbýstardy satyp alý jumystaryn qatar júrgizip, keler jyly jańa baǵyttardy ashamyz. Qazirgi kezde transformatorlary qosalqy stantsııalardyń qýattary álsiz, sondyqtan olardy da jańartýdy qolǵa alamyz. Bir sózben aıtqanda, Almatynyń trolleıbýs jelisi - elimizdegi eń iri kólik tarmaǵy.
Úshinshiden, qala syrtyna tasymaldaý máselesi pisip jetilgen sııaqty. Kún saıyn 61 baǵyt boıynsha 600 avtobýs qatynaıdy. Qyzmet kórsetý sapasy tómen. Avtobýstardyń basym bóligi tozǵan. Sondyqtan bul máseleni de retke keltirgen jón. Eski kólikti aýystyryp, jolaýshylarǵa bılet berý júıesin ashyq etý qajet. Qalalyq mobıldilik basqarmasyna (Telibaevqa) qalda modelin ýnıfıkatsııalaý sharalaryn qarastyrýdy tapsyrdym.
Bul sharalardyń basty maqsaty — qalalyqtarǵa sapaly kólik qyzmetin kórsetý jáne jolaýshy tasymalynyń qaýipsizdigin qamtamasyz etý.
