Baqytjan Saǵyntaev: Almatyda epıdemıologııalyq jaǵdaı kúrdeli

ALMATY. QazAqparat – Almatyda epıdemıologııalyq jaǵdaı kúrdeli. Bul týraly onlaın brıfıng barysynda qala ákimi Baqytjan Saǵyntaev málim etti, dep habarlaıdy QazAqparat tilshisi.

Epıdemııa bastalǵaly beri Almatyda ınfektsııanyń 35193 jaǵdaıy tirkelgen, onyń 24 012-de aýrý belgileri bar.

«Qaladaǵy epıdemıologııalyq jaǵdaıǵa keler bolsaq, jaǵdaı kúrdeli. Kúndelikti ósim baıqalady. Ótken táýlikte 595 adamnan koronavırýs anyqtaldy. Onyń 497 sımptomdy, 98 sımptomsyz. Almatydan jańa shtamdar shyqty. Bul aýrý sanynyń ósimine ákelip otyr», - dedi ákim.

Onyń aıtýynsha, aýrýhanalarda 2945 adam em qabyldap jatyr.

«Qalada vırýs juqtyrǵandardy qabyldaıtyn 7011 tósek-oryn ázirlengen. Olar 1, 2 jáne 3-eshelonǵa bólingen. Birinshi jáne ekinshi eshelon boıynsha aýyr jaǵdaıdaǵy naýqastardy qabyldaımyz. Qazir 7 myń tósek-orynnyń 5 430 tósek-orny iske qosylǵan jáne onyń 51 paıyzy toldy», - dedi Saǵyntaev.

Aýrýdyń aýyrlyq dárejesine nazar salar bolsaq, jaǵdaıy asa aýyr naýqastar sany - 52, osyndaı naýqastar sany artyp keledi.

2362 naýqastyń jaǵdaıy ortasha aýyr.

1 sáýirde 233 naýqas shyǵaryldy.