Baqytjan Saǵyntaev Almatyda avtobýs jelilerin damytýdy tapsyrdy
ALMATY. QazAqparat - Almaty ákimi Baqytjan Saǵyntaev Alataý aýdanyna jasaǵan saparynyń qorytyndysy boıynsha jaýapty basshylarǵa birqatar tapsyrma berdi, dep habarlaıdy QazAqparat tilshisi.
Megopolıs úshin avtobýs jelilerin damytý - óte ózekti. Ony durys sheshý úshin 200 avtobýsqa arnalǵan №3 avtopark jáne jeke tasymaldaýshynyń 130 avtobýstyq bazasy salynyp jatyr. Kásiporyn basshylarymen baǵyttardy sýbsıdııalaý, jyljymaly quramdy jańartý jáne júrgizýshiler men basqa mamandyq ıelerin daıyndaý qajet.
«Avtobýstar jańaryp, almatylyqtardyń sapaly qyzmetke degen suranysy artýda. Demek, tasymaldaýshylardyń biliktiligi joǵary bolýy tıis. Kolledjdermen birlesip jumys isteý kerek. Sol arqyly júrgizýshi, mehanık, elektrıkterdiń jáne basqa da mamandyq ıeleriniń tapshylyǵyn sheshýge bolady», - dedi Almaty qalasynyń ákimi Baqytjan Saǵyntaev.
Qala ákimi móltekaýdandardy ortalyqtandyrý prıntsıpi boıynsha damytyp, barlyq áleýmettik ınfraqurylymdy bir-birine jaqyn ornalastyrý kerektigin atap ótti.
«Bolashaqta qalamyzdyń damý qaǵıdasy: áleýmettik ınfraqurylym, jaıaý júrý sheginde bolýy kerek, bul - balalar alańdary, emhanalar, skver jáne demalys oryndary», - dedi ákim.
Memleket basshysy Qasym-Jomart Toqaevtyń tapsyrmasy boıynsha áleýmettik jaǵynan az qamtylǵan topty turǵyn úımen qamtamasyz etý jáne ınfraqurylymdy damytý máseleleri sheshilýde.
Jumys sapary kezinde B.Saǵyntaev Alataý aýdany Alǵabas eldi mekenindegi turǵyn úı qurylysynyń barysymen tanysty. Munda 8,3 ga ýchaskege 23 úı salynyp jatyr.
Avtor: Alma Muqanova
