Baqytjan Saǵyntaev Almaty oblysynyń kásipkerlerimen kezdesti
ASTANA. QazAqparat - QR Premer-Mınıstri Baqytjan Saǵyntaev Almaty oblysyna jumys sapary barysynda Aımaqtyq kásipkerler keńesiniń múshelerimen kezdesip, olarmen jappaı kásipkerlikti damytý, bıznes-ortany túbegeıli jaqsartý, ekonomıkany qaıta retteý jáne yryqtandyrý, ekonomıkanyń jańa basym salalaryn, jańa ındýstrııalardy, servıstik ekonomıka men «qarapaıym zattar» ekonomıkasyn endirý máselelerin talqylady.
«QR Prezıdenti N. Nazarbaev Qazaqstannyń úshinshi jańǵyrýyn jarııalap, elimizdiń aldyńǵy qatarly 30 eldiń qataryna enýi jolynda sapaly damýyn qamtamasyz etetin úsh mańyzdy jańǵyrý protsesin - saıası reformany, ekonomıkany jańǵyrtýdy jáne sanany jańǵyrtýdy bastap berdi», - dep atap ótti QR Premer-Mınıstri B. Saǵyntaev.
El Úkimeti «Atameken» Ulttyq kásipkerler palatasymen birlese otyryp memlekettik jáne kvazımemlekettik sektorlardaǵy satyp alýlarda jergilikti mazmunnyń úlesin arttyrý boıynsha jumysty odan ári jalǵastyratyn bolady. Atap aıtqanda, otandyq taýar óndirýshiler úshin ıeleri «Samuryq-Qazyna» UÁQ AQ kompanııalaryna arnap ónimder jetkizýge qatysýyna múmkindik beretin ındýstrııalyq sertıfıkat engiziledi.
Sonymen qatar, kásipkerlerge qarjylyq jáne zańnamalyq qoldaý kórsetý boıynsha jumystar júrgiziledi, bıznes úshin tekserýler men ruqsat berýler qysqarýda, sondaı-aq memlekettiń eldiń ekonomıkasyna qatysý úlesi tómendetilýde.
Kezdesý barysynda Almaty oblysynyń ákimi A. Batalov, ShOB damytý, eń aldymen uzaq merzimdi nesıelendirýdiń qoljetimdiligi problemasyn kótergen «Atameken» ulttyq kásipkerler palatasy tóraǵasynyń orynbasary T. Shotanov sóz sóıledi. Almaty oblysy Aımaqtyq keńesieiń tóraǵasy R. Salyqova aımaqtaǵy 118 myń ShOB sýbektileriniń 95 myńǵa jýyǵy (80%) AÓK salasynda qyzmet etetindikten, aýyl sharýashylyǵy ónimderin ótkizý máselesin kóterdi.
Óz kezeginde, oblystaǵy ÓKP Kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń tóraǵasy B. Faızýlın sot protsesteri kezindegi kásipkerlik múddelerin qorǵaý jáne ákimshilik kedergilerdi odan ári tómendetý qajettigi máselelerine kóńil aýdartsa, «Qasanjar» JShS bas dırektory J. Sarǵaldaqov mal sharýashylyǵy ónimderin eksporttaý jaǵdaıy týraly máseleni kóterdi.
«Hılnıchenko A.V.» JK basshysy A. Hılnıchenko, Almaty oblysynyń ishki týrızmdi damytý qaýymdastyǵynyń tóraǵasy R. Hakımov jáne «Geodezııa servıs» JShS bas dırektory, Almaty oblysynyń Jobalyq, jobalyq-izdený uıymdary qaýymdastyǵynyń tóraǵasy A. Anıkın Alakól, Balqash jáne Qapshaǵaı týrıstik aımaqtaryndaǵy ishki týrızmdi damytý boıynsha qordalanǵan máseleler men atqarylǵan jumystar týraly aıtyp berdi.
«TK-Metakon» JShS dırektory P. Srebnyı, «Dorplast-ınvest» óndiristik kompanııasy» JShS dırektory A. Hachatrıan energııa qýattylyǵynyń tapshylyǵyna, birqatar memlekettik satyp alýlar konkýrstarynyń ashyq emestigine, sondaı-aq «Bıznestiń jol kartasy-2020» baǵdarlamasynyń júzege asyrylýyna baılanysty máselelerge toqtaldy.
Kezdesý qorytyndylary boıynsha B. Saǵyntaev jaýapty memlekettik organdarǵa barlyq atalǵan máselelerdi qarastyryp, olardy baqylaýǵa alýdy tapsyrdy.
Aıta keteıik, aımaqtarǵa jumys sapary barysynda QR Premer-Mınıstri aıasynda kásipkerlikti qoldaý boıynsha memlekettiń júrgizip otyrǵan jumystaryn túsindiretin bıznespen kezdesýler ótkizýge erekshe kóńil bóledi. QR Prezıdenti N. Nazarbaev Qazaqstannyń úshinshi jańǵyrýy týraly Joldaýynda bıznestiń eldegi ekonomıkalyq ósimniń qozǵaýshy kúshine aınalýy kerektigin atap ótken bolatyn.
