Baqytjan Saǵyntaev: Agrarshylar ónimniń básekege qabilettiligin arttyrýy kerek
ASTANA. QazAqparat - QR Premer-Mınıstri Baqytjan Saǵyntaev SQO Qyzyljar aýdanynyń Novonıkolskıı aýylyndaǵy kezdesýde Aqmola, Soltústik Qazaqstan, Qostanaı, Qaraǵandy, Pavlodar oblystarynyń aýyl sharýashylyǵy taýarlaryn óndirýshilermen AÓK damytý jańa memlekettik baǵdarlamasynyń iske asyrylý barysyn talqylady, dep habarlandy QR Úkimetiniń resmı saıtynda.
QR Prezıdenti Nursultan Nazarbaevtyń tapsyrmasyna sáıkes, Úkimet jumysy Qazaqstannyń agrarlyq eksporttyq ónimniń iri óndirýshisi retinde qalyptasýy boıynsha mindetterdi sheshýge baǵyttalǵan. Osy maqsatta bıylǵy jyldyń basynda AÓK damytýdyń memlekettik baǵdarlamasy qabyldandy, onda aýyl sharýashylyǵyna qoldaý kórsetýdiń negizgi tetikteri qarastyrylǵan.
Úkimet atalǵan salanyń básekege qabilettiligin arttyrýǵa jaǵdaılar jasap jatyr. Sońǵy 5 jylda tikeleı memlekettik qoldaý kólemi shamamen 3 esege artty, astyq túsimdiligi men eńbek ónimdiligin arttyrýdyń júıelik sharalary qabyldanýda. Sýbsıdııalaýdyń jańa úlgisin engizý nátıjesinde sapaly tuqymdardy egý men tyńaıtqyshtardy qoldaný kólemi 1,5 esege ósti.
«Azyq-túlik korporatsııasy» AQ eksporttyq áleýetti arttyrý úshin syrtqy naryqtarda otandyq aýyl sharýashylyǵy ónimderin ilgeriletý boıynsha operator retinde qaıta quryldy. Memleket basshysynyń ýaǵdalastyqtyqtarynyń arqasynda sheteldik naryqtar ashylýda, sonyń qatarynda QHR, BAÁ, Iran jáne t. b. bar.
AÓK salasynda memlekettik qyzmetter usyný úderisteri ońtaılandyrylyp jatyr, qujattardyń merzimderi men tizimderi qysqartylýda, qosarlanýshy rásimder joıylýda. Bıyl sýbsıdııalardyń úsh túrin taǵaıyndaý úderisterin avtomattandyrý kózdelgen, kelesi jyly jumys sýbsıdııalardyń qalǵan 15 túri boıynsha aıaqtalady.
AÓK damytý memlekettik baǵdarlamasyn birinshi jartyjyldyqta iske asyrý qorytyndysy boıynsha QR Premer-Mınıstriniń orynbasary - aýyl sharýashylyǵy mınıstri A. Myrzahmetov baıandady. Aýyl sharýashylyǵynyń jalpy ónim kólemi ótken jyldyń sáıkes kezeńimen salystyrǵanda 3,1%-ǵa ulǵaıtyldy. Sonymen qatar, mal sharýashylyǵy ónimderiniń óndirisi 3,1%-ǵa, eginshilik sharýashylyǵy - 2,2%-ǵa ulǵaıtyldy. Osy kezeńde azyq-túlik ónimderiniń óndirisi 7,5%-ǵa ósti.
Oblysta AÓK damytý týraly SQO ákimi Q. Aqsaqalov baıandady. Keńestiń ózekti taqyryptary boıynsha «Mámbetov jáne K» TS bas dırektory E. Mámbetov, QR Et odaǵynyń tóraǵasy M. Baqtybaev, QR Kartop ósirýshiler jáne kókónis ósirýshi odaǵynyń tóraǵasy Q. Bısetaev, QR Fermerler odaǵynyń prezıdenti Á. Darynov, «Qazaqstannyń shoshqa ósirý sharýashylyqtary odaǵy» Qaýymdastyǵynyń tóraǵasy V. Lım, «Zenchenko jáne K» TS dırektory G. Zenchenko sóz sóıledi.
Aýyl sharýashylyǵy taýaryn óndirýshiler ımport pen eksporttyq saıasat boıynsha, mal sharýashylyǵyndaǵy veterınarlyq qaýipsizdik, egin sharýashylyǵyndaǵy sýbsıdııalaý men saqtandyrý, dızeldik otynmen jáne tyńaıtqyshtarmen qamtamasyz etý týraly usynystaryn engizdi.
QR Premer-Mınıstri Baqytjan Saǵyntaev keńes qorytyndysyn shyǵara otyryp, QR ulttyq ekonomıka mınıstrligine aýyl sharýashylyǵy taýaryn óndirýshiler men otandyq aýyl sharýashylyǵy tehnıkasyn óndirýshilerge salyq salý máselesin pysyqtaýdy, QR aýyl sharýashylyǵy mınıstrligine sýbsıdııalaý tetikterin jetildire túsý máselelerin baqylaýǵa alýdy tapsyrdy. «QazAgro» holdıngine agrarshylar usynǵan ınvestıtsııalyq jobalardy qaraý tapsyryldy.
