Baqytjan Ertaev Arystaǵy jarylysqa qatysty pikir bildirdi
«Qazir kóp suraqtar qoıylyp jatyr. Meniń oıymsha, mundaı oqıǵanyń qaıtalanbaýy úshin osy máseleni ary qaraı egjeı-tegjeıli talqylaý kerek. Qaza bolǵandardyń týystaryna qaıǵyryp kóńil aıtamyn. Zardap shekkenderdiń tezirek saýyǵyp ketýin tileımin. Májilis depýtattary birinshi kúnnen bastap osy qaıǵyly jaǵdaıǵa ortaq bolyp, qolymyzdan kelgenshe járdem berip jatyrmyz. Májilis tórǵasynyń usynysy boıynsha birqatar depýtattar qazir Arysta. Osyndaı jaǵdaıǵa jol berilmeýi kerektigi túsinikti. Áskerı adam retinde bul jaǵdaı kúrdeli ekenin bilemin. Quzyretti organdar bul máseleniń mán-jaıyn anyqtaıdy, sáıkesinshe, tıisti qorytyndy shyǵarady», - dedi B. Ertaev.
Depýtattyń aıtýynsha, Arystaǵydaı arsenaldyń qorǵanysy joǵary bolýy tıis.
«Osyndaı arsenaldar jan-jaqty kúzetpen, qorǵanyspen qamtamasyz etilýi tıis. Meniń oıymsha,quzyretti organdar bul máseleni tolyqtaı zertteıdi. Sondyqtan osyndaı oqıǵalarǵa jol bermes úshin tıisti sharalardy qabyldaıdy», - dedi Ertaev.
Aıta keteıik, Parlament Májilisiniń tóraǵasy Nurlan Nyǵmatýlın Arys turǵyndarymen kezdesý úshin depýtattar Túrkistan oblysyna attanǵanyn jetkizdi.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Apat saldarynan eki adam mert boldy. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondaı-aq Elbasy Nursultan Nazarbaev Arystaǵy jaǵdaıǵa alańdaýshylyq bildirdi.
Búgingi Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletinin aıtty.
Evakýatsııalaý kezinde myńnan astam ata-ana balarynan kóz jazyp qaldy. Qazirgi ýaqytta olardyń barlyǵy da balalarymen qaýyshty, barlyǵy din-aman.
Fakti boıynsha qylmystyq is qozǵady.
Qaladaǵy tótenshe jaǵdaı jolaýshylar poıyzdarynyń kestesine de áser etti.
25 maýsym, saǵat 12.00-degi jaǵdaı boıynsha áskerı bólim aýmaǵynda jarylystar toqtady. Degenmen, oq-dáriler saqtalatyn qoımalardyń aýmaǵynda byqsyǵan ottyń oshaqtary baıqalǵandyqtan, QR Іshki ister mınıstrligi jarylystardyń qaıtalaný qaýpi saqtalyp otyrǵanyn eskertti.
Osy ýaqytta QR Qorǵanys mınıstrliginiń áskerı-ınjenerlik qyzmetshileri Arys qalasyn mınadan tazalaý jumystaryn júrgizip jatyr. Snarıadtardyń deni turǵyn úı alqaptaryna túsken.
Arys turǵyndaryna kómek qolyn sozý maqsatynda elimizde «Arys, biz birgemiz» aktsııasy bastaý aldy.
