Baqytjan Bazarbek Jer kodeksinen «úlestes zańdy tulǵa» uǵymyn alyp tastaýdy usyndy

NUR-SULTAN. QazAqparat – Jer kodeksiniń 12-babyna sáıkes, úlestes zańdy tulǵa ózinen bólek 10, tipti 100 zańdy tulǵa ashyp, olardyń árqaısyna quryltaıshy bola alady. Bul týraly QR Aýyl sharýashylyǵy mınıstrligi jer reformasy komıssııasynyń otyrysynda zańger Baqytjan Bazarbek aıtty, dep habarlaıdy QazAqparat tilshisi.

«Materıalısterdiń paıda bolýy qoǵamnyń narazylyǵyn týǵyzyp otyr. Úlken-úlken jerlerdi, myńdaǵan, mıllıondaǵan gektar jerdi menshiktep alǵan jer ıelenýshileri bar. Úlestes zańdy tulǵa Jer kodeksiniń 12-babyna sáıkes ózinen bólek 10, tipti 100 zańdy tulǵa ashyp, onyń árqaısysyna quryltaıshy bola alady. Árbirine tıisti shekti kólemde jerdi rásimdep, al shyn máninde ol jerdiń bárine ózi ıelik etýge múmkindigi bar», - deıdi «Bazarbek&Partners» zań kompanııasynyń bas dırektory Bazarbek Jumabekuly.

Onyń aıtýynsha, mundaı monopolııanyń aldyn alý úshin Jer kodeksiniń 50-baby, 3-tarmaǵynan «úlestes zańdy tulǵa» degen uǵymdy alyp tastaý kerek.

«Bul uǵymdy zańnan alyp tastaý kerek nemese «zańdy tulǵa men onyń úlestes tulǵalary jalpy jıyntyqpen bir ǵana kólemdegi jerge ıe bolýy tıis» degen uǵymdy engizýimiz kerek. Bul – halyq úshin ıgi bastama bolar edi», - deıdi ol.