Baqytjan Bazarbek balasynyń arbasynyń órtelýi týraly: Bul áreket - qasaqana arandatý
«Men qaýiptiń qaı jaqtan tónip jatqanyn bilmeımin. Degenmen, bul máseleni qazirgi jumystarmen baılanystyramyn. Máselen, qazir «Jer amanaty» respýblıkalyq komıssııasymen Forbes jýrnalyna engen birneshe olıgarhtyń jerlerin tekserip jatyrmyz. Odan bólek, tıisti zań jobalaryn pysyqtap jatyrmyz. Sondyqtan qaı jaqtan qaýip tónip turǵanyn naqty aıta almaımyn», - dedi B. Bazarbek Májiliste zań jobasynyń tanystyrylymynan keıin tilshiler suraǵyna jaýap bere otyryp.
Bul turǵyda ol Almaty mańyndaǵy jer telimderi men ulttyq park aýmaǵyndaǵy jerlerdi tekserý is-sharalaryna belsendi túrde qatysyp jatqanyn aıtty. Sonymen qatar, iri qurylys kompanııalaryna tıesili jer ýchaskeleri de tekserilip jatyr.
«Almatydaǵy bul oqıǵa boıynsha beınekamera túsirgen taspany qaradym. Kúdikti adam arbany órtep, ketip qalǵan. Meniń oıymsha, bul áreket - qasaqana arandatý. Keıin kúdikti adam psıhıkalyq dertke shaldyqqan dep túsindirýi múmkindigin de joqqa shyǵarmaımyn. Atap aıtqanda, men muny kásibı qyzmetime baılanysty arandatý áreketi dep esepteımin. Keıingi kezderi ózime qatysty qoqan-loqy jasamaqshy bolǵandar jıi kezdese bastady. Bul respýblıkalyq jer komıssııasy boıynsha qyzmetten bastaldy», - dedi depýtat.
Baqytjan Bazarbek balalar arbasyn órteý oqıǵasy boıynsha polıtsııaǵa júgingenin aıtty.
«Men olarǵa Parlament depýtatynyń qyzmetine kedergi keltirý boıynsha qylmystyq is qozǵaý kerek dep aıttym. Alaıda polıtsııa bul bappen emes, buzaqylyq boıynsha qylmystyq is qozǵaldy», - dedi depýtat.
Onyń aıtýynsha, ótken aptada depýtattar orman sharýashylyǵy týraly zańǵa ózgerister men tolyqtyrýlar engizý týraly zań jobasyn qabyldamaǵan.
«Bir top senator bul jobany Parlament Májilisinen «ótkizip jiberýge» tyrysty. Osylaısha, biz jerdi erekshe qorǵalatyn tabıǵı aýmaqtardan aýyldyq eldi mekenderge bergende olar qaýipti jaǵdaı týdyrǵylary keldi. Munyń artynda kim turǵanyn da bilemiz. Munyń artynda osy jerlerdi satyp alǵan keıbir adamdar tur. Aıtýlarynsha, olardy keıbireýler qatelesip ulttyq saıabaqtar men qoryqtardyń quramyna kirip ketken úılerin zańdastyrý kerek dep ıtermeleıdi. Biz olarǵa sot organdaryna júginýge keńes berdik. Biraq biz munyń artynda jer telimderin satyp alyp, depýtattar arqyly qoǵamǵa qaýipti zań jobasyn «shyǵarýǵa» tyrysatyn áldebir kúshter bar dep esepteımiz. Biz onyń jolyn kesip, komıtet otyrysyna kelisim bergen joqpyz. Erteń komıtet bul zań jobasyn qaıta qaraıdy», - dep túıindedi ol.
Eske salsaq, birneshe kún buryn áleýmettik jelide B. Bazarbek balasynyń arbasyn páteriniń aldynda belgisiz bireýler órtep jibergenin jazǵan edi.
