Baqytjan Abdýrahmanov: Eresekter arasynda jeńiske jetý ońaı bolǵan joq
NUR-SULTAN. QazAqparat - Eresekter arasynda jeńiske jetý ońaı bolǵan joq. Dzıýdodan Slovakııada ótip jatqan Eýropa kýbogynda top jarǵan Baqytjan Abdýrahmonov Olympic.kz saıtyna bergen suhbatynda osylaısha aǵynan jaryldy.
«Bul altyn júldeniń orny bólek. Óıtkeni, meniń eresekter sapyndaǵy alǵashqy iri jarysym. Sol synda top jarǵanyma sheksiz qýanyshtymyn. Jalpy 73 keli salmaq dárejesinde alǵash ret kúreskendikten qarsylastarymnyń kim ekenin bilgen de joqpyn. Tatamıde alty kezdesý ótkizip, barlyǵynda jeńiske jettim. Ekinshi kezeńde nemis balýanyn úsh eskertýmen uttym. Al qalǵandarynyń bárinen upaı aldym. Fınaldyq kezdesýdiń negizgi bóliginde qarsylasym aldyrmaǵan bolatyn. Qosymsha ýaqytta jaqsy ádis jasap, «ıppon» upaıymen jeńdim. Munyń bári aıtýǵa ońaı. Al shyn máninde, eresekter arasyndaǵy iri týrnırde top jarý aıtarlyqtaı qıyn. Bul dodada kóp kúsh kerektigin túsindim. Óıtkeni, qarsylastardyń barlyǵy da óte tájirıbeli. Maǵan senim artqan bapkerim Azamat Muqanovqa alǵysym zor. Endigi maqsat – jastar arasyndaǵy álem chempıony ataný», - deıdi Baqytjan.
Aıta ketelik, Eýropa kýbogynda Qazaqstan komandasy bir altyn medalmen altynshy orynda keledi.