Baqytymdy qazaq jigitinen taptym - Tamara Salabekova
Belarýs ultynyń qyzy Tamara sonaý 1982 jyly joldamamen Jambyl oblysy Talas aýdany Aqkól aýylyna barǵan. Baılanys júıesiniń ınjeneri mamandyǵyn meńgergen ol az ýaqyttyń ishinde aýdandyq baılanys torabyndaǵy jumysty ıgerip alyp ketedi. Aqkóldiń aqkóńil halqy ony jaqyn tartyp, jergilikti turǵyndarmen tez til tabysypty.
Óziniń aıtýynsha Tamara bir jyldyń ishinde sol Aqkólge kelin bolyp túsedi.
«Aqkólge Elena degen qurbym ekeýmiz joldamamen barǵan bolatynbyz. Ekeýmiz de qazaq jigitterimen kóńil jarastyrdyq. Men mýzyka mamany, kompozıtor Áýeshan Salabekovtiń jary atansam, qurbym Nurhan Tólendıev degen jigittiń baqytyna aınaldy. Áýeshannyń anasy Úrzada apama óz shesheme qaraǵandaı, qurmetpen qaradym. Ol kisi qazir 90 jasta, ortamyzda baqytqa bólenip otyr», - deıdi Tamara Salabekova.
Onyń kúıeýi Áýeshan birneshe aǵaıyndy bolǵan. Olar qazir ekeýi egiz ul-qyzdy dúnıege ákelip, tárbıelep ósirgen ata-ana. Búginde nemereleriniń súıikti ata-ájesi atanyp otyr.
Aıta keteıik, tarazdyq Áýeshan Salabekov «Hat jazyp tur», «Rahmet saǵan, týǵan el» sekildi kóptegen tanymal ánderdiń avtory.
«Qazaq halqyna, onyń ishinde ulaǵatty áýletke laıyqty kelin boldym dep oılaımyn. Ul-qyzymyz Dáýren men Ásel de mýzykadan alys emes. Qazaqtyń kelini bolǵan soń, memlekettik tildi de, orys, belarýs tilderin de jaqsy bilemin. Otbasymyz da qazaqsha sóılesip, qazaqtyń ulttyq taǵamy et asyp, máre-sáre bop otyramyz. Men ózimdi baqytty sanaımyn. Áýeshandaı azamattyń baǵyn jandyrdym, ol da meniń baǵymdy ashty. Meıirban, darhan, jomart kóńildi qazaq eline alǵysym sheksiz», - deıdi Tamara aǵynan jarylyp.
