Baqyttyń kiltin eńbekten tapqan Eshimovter otbasy

KÓKShETAÝ. QazAqparat - Jarty ǵasyrdan astam ýaqyt ómir aıdynynda qol ustasyp birge júzip kele jatqan aqmolalyq Aqylbek pen Gúlsim Eshimovter otbasynyń jetken jetistigi men alǵan asýy keleshek urpaq úshin úlgi ónege bolarlyqtaı. Bıyl bul baqytty juptyń shańyraq kótergenine 53 jyldyń júzi bolypty. Otaǵasy Aqylbek eńbekke degen qulshynysy men tabandylyǵynyń arqasynda quqyq qorǵaý organdary salasynda bıik belesterge jetse, jan joldasy Gúlsim qarjy salasynda uzaq jyldyq tájirıbesi bar, dep habarlaıdy QazAqparat tilshisi.

Bala kezinen polıtsııa bolýdy armandaǵan Aqylbek Eshimov ishki ister organdaryndaǵy mansabyn Jaqsy aýdandyq Іshki ister bóliminde serjant retinde bastapty. Keıin azamattardyń seniminen shyǵyp, áriptesteriniń arasynda syıly bolǵan ol qoǵamdyq tártipti saqtaýdyń aldyn alýda ýchaskelik ınspektor, ınspektor qyzmetine taǵaıyndaldy. Artynsha, onyń boıyndaǵy adamgershilik qasıetterdi baıqaǵan basshylyq tólqujat rásimdeý bóliminiń basshysy etip taǵaıyndaıdy. Jaqsy aýdandyq ishki ister organdarynyń sotsıalıstik múlik urlyǵymen kúres bóliminiń basshysy qyzmetine deıin kóterildi. Ol qyzmet istep júrgen kezinde kóptegen aýyr qylmystardyń beti ashyldy. 30 jyldan astam ýaqyt bir salada tapjylmastan istegen eńbeginiń arqasynda quqyq qorǵaý organdary salasynda mol tájirıbe jınaqtap, ujymda syıly bola bildi. Mılıtsııa maıory jáne vedomstvodan tys kúzet bóliminiń basshysy bolyp qurmetti eńbek demalysyna shyqqan Aqylbek Eshimov Jaqsy aýdanynyń qurmetti azamaty jáne QR ІІM vedomstvolyq nagradalarymen birneshe ret marapattalǵan. Sol sebepti osy kúni bilikti maman ári óz isine adal bolǵan jandy ıyq tirestirip birge qyzmet istegen áriptesteri men sońynan ergen jas mamandar úlgi tutady.

«Bul qyzmetke eń basty keregi – adamgershilik, tózim, saýattylyq. Sondaı-aq bul qyzmet adamdy shydamdylyqqa úıretedi. Jaýapty jumys bolǵandyqtan, basshylardyń bergen tapsyrmalaryn múltiksiz oryndaýǵa tyrystym. Men úshin bul úlken jaýapkershilik boldy», - deıdi zeınetker.

Al, osy shańyraqtyń uıytqysy bolyp otyrǵan Gúlsim Nurjanova kópbalaly otbasynan shyqqan eken. Tselınograd saýda tehnıkýmyn támámdaǵan soń, uzaq ýaqyt qarjy salasynyń ystyq sýyǵyna tózip eńbek etken. Boıynda týa bitken asyl qasıetteriniń arqasynda otaǵasy men balalarynyń babyn taýyp, qyzmetiniń de berekesin keltire bildi.

«Ata kórgen oq jonar, ana kórgen ton pisher» degendeı, búgingi tańda áke jolyn qýyp úlken uldary Janatbek Aqylbekuly polıtsııa polkovnıgi, Kókshetaý qalalyq polıtsııa basqarmasynyń bastyǵy. Al, odan keıingi uldary Maralbek Aqylbekuly QR Bas prokýratýrasynda bólimshe bastyǵy, qyzdary Dana zań ǵylymdarynyń kandıdaty, Ulttyq Ekonomıka mınıstriligi janyndaǵy aktsıonerlik birlestiginde basshynyń orynbasary qyzmetinde. Ata-anasynan úlgi alǵan balalary da búgingi kúni shańyraqtaryn bıik, keregelerin myqty ustap otyr.