«Baqytty otbasymen» nesıe alyp berýge ýáde bergen alaıaq ustaldy
NUR-SULTAN. QazAqparat – Kúdiktige 2 mln teńge jymqyrdy degen aıyp taǵylyp otyr, dep habarlaıdy QazAqparat ShQO Polıtsııa departamentiniń baspasóz qyzmetine silteme jasap.
«24 jastaǵy jumyssyz shyǵysqazaqstandyq turǵyn «Halyq bank» AQ klıentteriniń bank kartalarynan 2 mln teńge jymqyrdy degen kúdikpen ustaldy. 2018 jyldyń basynan beri ol áleýmettik jelilerde (VKontakte, Instagram), «OLX» onlaın-habarlandyrý alańynda ekinshi deńgeıli bankterden, sondaı-aq, «Baqytty otbasy» ıpotekalyq baǵdarlamasy arqyly nesıe alýǵa kómektesetini týraly habarlama taratqan. Osydan keıin áleýmettik ınjenerııany paıdalana otyryp, ol adamdardyń rekvızıtterin (shot nómiri, bank kartalarynyń nómiri, anketalyq málimetir, JSN, SMS-kodtar) paıdalanǵan», - delingen departamenttiń habarlamasynda.
Tergeý nusqasyna sáıkes, túsken qarajatty kúdikti Nur-Sultan, Almaty, Shymkent jáne Semeı qalalarynda qolma-qol shyǵaryp otyrǵan. Onyń qazir 7 iske qatysy bary tergelýde. Kóbinese onyń quryǵyna Qazaqstannyń ońtústik óńirleriniń azamattary ilingen.
Qazirgi ýaqytta kúdiktiniń ústinen QR QK-niń 190-baby 2-bóligi (alaıaqtyq) boıynsha sotqa deıingi tergeý amaldary júrgizilip jatyr.
