«Baqytty otbasy» turǵyn úı baǵdarlamasyna qujat qabyldaý bastalady

ALMATY. QazAqparat - Almaty ákimi Baýyrjan Baıbek Memleket basshysynyń «Nur Otan» partııasynyń XVIII sezinde aıtqan halyqtyń az qamtylǵan tobyna, onyń ishinde kópbalaly analarǵa qoldaý kórsetý jónindegi tapsyrmasyn oryndaý boıynsha qalalyq jospardy tanystyrdy, dep habarlaıdy QazAqparat tilshisi.

Jıynda belgili bolǵandaı, 11 naýryzdan bastap «Baqytty otbasy» arnaıy qalalyq turǵyn úı baǵdarlamasy boıynsha qujattar qabyldanady.

Alǵashqy jarna turǵyn úı qunynyń 10%-y, mólsherleme - 2%. Kezekte turǵan 1276 kópbalaly jáne tolyq emes otbasylardyń alǵashqy jarnany tóleýge qarajattary joq bolǵandyqtan qala bıýdjetinen 1 mln teńgeniń turǵyn úı sertıfıkattary bólinedi.

Sondaı-aq, 20 naýryzdan bastap az qamtylǵan otbasylardyń 4 myńǵa jýyq oqýshylaryna alǵash ret stıpendııa tólenedi. Mektep oqýshylary aı saıyn 5 myń teńgeden, al ýnıversıtetter men kolledjder stýdentteri 10 myń teńgeden alady.

Qıyn jaǵdaıǵa dýshar bolǵandarǵa beriletin bir rettik tólem kólemi 25 myńnan 50,5 myń teńgege kóbeıedi.

15 naýryzdan bastap járdemaqy kólemi artyp, 5 myńǵa jýyq adamdy qamtıdy.

15 naýryzdan bastap az qamtylǵan otbasylarǵa ystyq jáne sýyq sý eseptegish quraldaryn jeke ornatýǵa beriletin járdemaqy kólemi 70%-ǵa nemese 5 myńnan 8,6 myńǵa ósedi. Bulardan ózge, az qamtylǵandar tobyna kommýnaldyq qyzmetke ketetin shyǵynnyń ornyn toltyrý úshin beriletin járdemaqy kólemi 5%-ǵa deıin artady.

1 naýryzdan Almatydaǵy jumyssyz analardy oqytý jáne kásibı daıyndaý sharalary bastaldy ári olarǵa 16,7 myń teńge kóleminde stıpendııa beriledi. Qalada jastar praktıkasy, sýbsıdııa bólip jumyspen qamtý, jalaqysy 63 myń teńgelik áleýmettik jumysqa tartý sharalary uıymdastyrylýda.

Bir tereze qaǵıdasy boıynsha jumys jasaıtyn kópbalaly analar Ortalyǵynda quqyqtyq jáne psıhologııalyq keńester beriledi, reabılıtatsııalyq kómek kórsetiledi, ortalyq 1 sáýirden bastap esigin ashady. Munda kópbalaly analar eńbekpen qamtylady, mını-bala baqshalar uıymdastyrylady.

Qalalyq Áleýmettik ál-aýqat basqarmasynyń basshysy Rahat Shımasheva megapolıste «Nurly jer» baǵdarlamasy boıynsha jalǵa beriletin, onyń ishine kópbalaly otbasylar da kiredi, 40 myńnan astam páterler qurylysy bastalatynyn aıtty.

Ataýly áleýmettik kómek kólemin kún kóris kórsetkishinen 70%-ǵa deıin kóterý barysynda Almatyda ony alatyndar sany 2 699 dan 4000 adamǵa ósti. Múgedek balalardy tárbıeleýshilerge beriletin tólem kólemi 31,1 myńnan 41,6 myńǵa artty. Bul shara 7 394 adamdy qamtıdy. Memleket basshysynyń tapsyrmasy boıynsha Almatynyń bıýdjettik salasyndaǵy 30 myńnan astam qyzmetkerlerdiń jalaqysyn 30%-ǵa deıin kóterý josparlanǵan.

Eske sala keteıik, 1 naýryzdan bastap kóp balaly otbasylardyń ekinshi, úshinshi balalary baqshaǵa tegin baryp júr. Qalalyq bıýdjet olardyń tamaqtaný aqysyn óz moınyna aldy.