«Baqytty otbasy»: ShQO-da 38 myń adam ataýly áleýmettik kómek alady

ÓSKEMEN. QazAqparat - «Nur Otan» partııasynyń Shyǵys Qazaqstandaǵy músheleri elordada ótetin partııanyń kezekti sezine delegattar saılady, dep habarlaıdy QazAqparat tilshisi.

Óskemende «Nur Otan» partııasy oblystyq fılıalynyń konferentsııasy ótti. Partııa ókilderi astanada ótetin kezekten tys sezge qatysatyn delegattardy saılady. Jıynda «Nur Otan» qolǵa alǵan «Baqytty otbasy», «Qutty meken», «Halyqqa kómek», «Aýyl - el besigi» atty jobalardyń qalaı júzege asyp jatqany talqylandy.

Oblystyq fılıal tóraǵasynyń birinshi orynbasary Ánýarbek Muhtarhanovtyń aıtýynsha, "Halyqqa kómek" jobasy boıynsha 3000 adam partııaǵa júginip, 314 adamnyń máselesi sheshimin tapqan. Al "Baqytty otbasy" jobasy arqyly 38 myń turǵynǵa ataýly áleýmettik kómek kórsetý úshin 1,4 mlrd teńge bólingen.

"Qutty meken" jobasy da ilkimdi isterge muryndyq bolýda. Oblystyq jáne aýdandyq mańyzdaǵy joldardy jóndeý úshin 1,5-2 mlrd teńge qarastyryldy. Halyqty sapaly aýyzsýmen qamtý úshin 60 joba qolǵa alynbaq.



Al "Aýyl - el besigi" jobasynyń aıasynda 82 myń ga sýarmaly jerdi ıgerý kózdelip otyr. 2022 jylǵa deıin syrttan 36 myń bas iri qara satyp ákelinedi. Osylaısha aýyl keleshegi kemeldene túsedi" - dedi Ánýarbek Muhtarhanov.