«Baqytty otbasy»: Qostanaıda psıhologııalyq bilim ortalyǵy ashyldy
QOSTANAI. QazAqparat – Qostanaıda elde balamasy joq psıhologııalyq jáne qosymsha bilim berý óńirlik ortalyǵy ashyldy, dep habarlaıdy QazAqparat.
Atalǵan jobanyń iske asyrylýyna oblys qazynasynan 54 mln teńge bólingen. Bastama «Nur Otan» partııasynyń «Baqytty otbasy» jobasy sheńberinde júzege asty. Ashylý saltanatyna Qostanaı oblysy ákiminiń orynbasary Marat Júndibaev, «Nur Otan» partııasy Qostanaı oblystyq fılıalynyń orynbasary Janabaı Bısımbaev pen «Nur Otan» partııasy janyndaǵy Balalar quqyqtaryn qorǵaý keńesi tóraǵasynyń orynbasary Dınara Zakıeva qatysty.
«Ortalyq mamandary oqýshylarǵa qosymsha bilim berýmen qatar, ata-analar men muǵalimderge de psıhologııalyq kómek kórsetedi. Sebebi, sýıtsıdtik minez-qulyq deńgeıi boıynsha sońǵy jyldary oblystyń kórsetkishteri máz emes. Ásirese, kámelet jasyna jetpegenderdiń jaǵdaıy erekshe baqylaýdy qajet etedi. 2016 jyly 8 sýıtsıd jasalsa, 2018 jyly osyǵan uqsas 12 jaǵdaı tirkelgen», - deıdi psıhologııalyq kómek pen qosymsha bilim berý ortalyǵynyń dırektory Elena Petrenko.
Ortalyq mamandary ádistemelik keńes berý, semınar-trenıng, koýchıngter ótkizedi. Bala men ata-ananyń arasyndaǵy máselelerdi sheshý úshin arnaıy bólim de qurylǵan.
«Basty maqsatymyz – balalar úshin psıhologııalyq kómektiń qoljetimdiligin, sapasyn arttyrý, sondaı-aq psıholog mamandarynyń kásibı quzyrettiligin damytý. Qazir biz jas óskinmen psıhologııalyq keńes berýden bólek, áskerı-patrıottyq, kórkem-estetıkalyq, áleýmettik baǵyttar boıynsha da jumys isteımiz. Mamandar ata-ana men balalar arasyndaǵy túsinbeýshilik, balalarǵa qatysty zorlyq-zombylyq áreketteriniń aldyn alý, jasóspirimder arasyndaǵy erte júktilik, tótenshe jaǵdaıdan keıin balalarmen jumys, psıhologııalyq dıagnostıka júrgizedi», – dedi oblystyq bilim berý basqarmasynyń basshysy Vasılıı Tsymbalıýk.
«Nur Otan» partııasy janyndaǵy Balalar quqyqtaryn qorǵaý keńesi tóraǵasynyń orynbasary Dınara Zakıevanyń sózinshe, bul tájirıbeni ózge de oblystarǵa engizýge bolady.
«Otbasyndaǵy zorlyq-zombylyqtardan qorǵaý, sýıtsıdtiń aldyn alý –qoǵamdaǵy ózekti máselelerdiń biri. Mundaı psıhologııalyq ortalyqtardyń ár oblysta bolýy zańdylyq. Psıhologııalyq qoldaý ortalyǵynda táýlik boıy 37-08-58 senim telefony jumys isteıdi. Bul da úlken kómek», - deıdi Dınara Zakıeva.
Qazir front-keńsege 10 psıholog maman men 6 pedagog qyzmetke alyndy.
Odan bólek, arnaıy mobıldy top qurylǵan. Bul ortalyq bilim mekemelerindegi basqa da psıhologııalyq shaǵyn nysandardy basqarady. Mundaı nysandar buǵan deıin bilim basqarmasynyń qaramaǵynda bolǵan edi.
