«Baqytty otbasy» baǵdarlamasynda tabysqa shekteý qoıylmaıtyn boldy
Spıkerdiń sózinshe, bıyl elimizde 5 000-ǵa jýyq otbasyna nesıe beriledi.
«Qazaqstandyq otbasylardy jeńildetilgen sharttarmen nesıelendirýge bıyl respýblıkalyq bıýdjetten 51 mlrd teńge bólindi. Atalmysh qarajat bankke tústi. Bul qarajat aıasynda 5000-ǵa jýyq otbasy nesıelendiriletin bolady», - dedi Danagúl Túsipova.
Sonymen qatar, ol Baǵdarlama sharttaryna birqatar oń ózgeris engizilgenin atap ótti.
Endi «Baqytty otbasy» baǵdarlamasyna kópbalaly otbasylar men múmkindigi shekteýli balalardy tárbıelep otyrǵan otbasylarmen qatar, «jetim balalar men ata-ana qamqorlyǵynsyz qalǵan balalar» sondaı-aq «I jáne II toptaǵy múgedekter» sanattary boıynsha turǵyn úı kezeginde turǵan qazaqstandyqtar da qatysa alady. Jańa qosylǵan sanattar boıynsha «Baqytty otbasy» baǵdarlamasyna qatysýshalar óz ótinishterin jańa baıqaý jarııalanǵan ýaqytta joldaı alady.
«Taǵy bir jaǵymdy jańalyq – «Baqytty otbasy» baǵdarlamasynda tabysqa shekteý qoıylmaıdy. Buǵan deıin otbasy músheleriniń sońǵy alty aıdaǵy tabysy eń tómengi kúnkóris deńgeıiniń 3,1 eselengen mólsherinen, ıaǵnı 115 905 teńgeden aspaýy kerek degen talap bar bolatyn. Mysaly, kópbalaly otbasy otaǵasynyń jalaqysy belgilengen normadan 200 teńgege asyp ketse, bul otbasy qoljetimdi nesıege qol jetkize almaıtyn», - dep túsindirdi spıker.
Sondaı-aq, «Baqytty otbasy» baǵdarlamasy qatysýshylardy nesıeniń maksımaldy somasymen shektemeıtin bolady. Osyǵan deıin aımaqqa baılanysty ol 10 mıllıonnan 15 mıllıon teńgege deıin ǵana bolatyn. Endi nesıe somasy páter qunyna negizdeletin bolady jáne turǵyn úıdiń 1 sharshy metriniń baǵasynan qalyptasady.
Qabyldanǵan Tujyrymdamaǵa sáıkes taza árleýdegi turǵyn úıdiń 1 sharshy metri úshin kelesideı baǵa parametrleri belgilengen:
Astana, Almaty qalalarynda jáne olardyń mańaıyndaǵy aýdandarda 290 myń teńgege deıin;
Atyraý jáne Mańǵystaý oblystarynda 240 myń teńgege deıin;
Shymkent qalasynda, Qostanaı, Túrkistan, Qaraǵandy jáne Ulytaý oblystarynda 220 myń teńgege deıin;
Shyǵys Qazaqstan, Batys Qazaqstan, Qyzylorda jáne Abaı oblystarynda 200 myń teńgege deıin;
Aqtóbe, Aqmola, Almaty, Pavlodar, Soltústik Qazaqstan, Jambyl jáne Jetisý oblystarynda 180 myń teńgege deıin.
Áleýmettik turǵyn úı 3-4 jaılylyq klasyna sáıkes keletin jáne páterdiń eń úlken aýdany 80 sharshy metrden aspaıtyn bolady.
Jyljymaıtyn múlik qaryz alýshy turǵyn úı kezeginde turǵan aımaqtan satyp alynýy tıis.
«Taǵy bir mańyzdy aqparat, endi «Baqytty otbasy» baǵdarlamasy boıynsha jergilikti ákimdikter arqyly salynǵan áleýmettik nesıelik turǵyn úılerdi ǵana satyp alýǵa bolady», - dep naqtylady ÓKQ spıkeri.
Ony otbasybank.kz portalynan tańdaýǵa bolady. Turǵyn úıdi tańdaýǵa nemese óńirde úıdiń qoldanysqa berilýin kútýge (eger ótinish bergen ýaqytta portalda satyp alýǵa shyǵarylǵan baspana bolmasa) baǵdarlama qatysýshysyna 2023 jyldyń aqpan aıynyń sońyna deıin ýaqyt beriledi. Osy ýaqytqa deıin qatysýshynyń ótinishi saqtalady.
«Baqytty otbasy» baǵdarlamasy boıynsha paıyzdyq mólsherleme ózgerissiz, jyldyq 2% mólsherinde qalady, eń tómengi bastapqy jarna – 10%. Nesıeniń maksımaldy merzimi – 20 jylǵa deıin beriledi. Nesıe alý úshin baǵdarlamaǵa qatysýshylar tólem qabilettiligin rastaýlary qajet.
Aıta keteıik, «Baqytty otbasy» baǵdarlamasy júzege asyrylǵan úsh jyl ishinde 14 700 qazaqstandyq otbasy qonys toıyn toılady.
Tujyrymdamaǵa sáıkes elimizde jeńildetilgen nesıelik turǵyn úı baǵdarlamalary «2-10-20» («Baqytty otbasy» baǵdarlamasy) jáne «5-10-20» («Shańyraq» baǵdarlamasy) aıasynda júzege asyrylatyn bolady.
«5-10-20» baǵdarlamasy boıynsha jergilikti ákimdikterde baspana kezeginde turǵan azamattardyń barlyq sanattary páter ala alady. Tabys boıynsha shekteýler bolmaıdy. Bastysy baǵdarlamaǵa qatysýshylar tólem qabilettiligin rastaýlary qajet. Baǵdarlama boıynsha jergilikti ákimdikter arqyly salynǵan áleýmettik nesıelik turǵyn úılerdi ǵana satyp alýǵa bolady»,- dedi ol.
Foto:1nsk.ru
