«Baqytty otbasy»: Aqtóbede kópbalaly analardyń alǵashqy jarnasy tólenedi
Aqtóbe oblysy boıynsha Turǵyn úı qurylys jınaq bankinde 98 myńǵa jýyq salymshy bar. Olardyń depozıttegi aqshasy 50 mıllıard teńgege jýyqtady. Aqtóbe oblysynyń ákimdigi men «Báıterek» holdıngi arasyndaǵy memorandýmǵa sáıkes, 2 jyl ishinde 2 mıllıard teńgege páter beriledi. Jyl basynda bıýdjetten 200 mıllıon teńge bólindi. Bul qarjyǵa 250 sertıfıkat berýge bolady. Bul sertıfıkat Turǵyn úı qurylys jınaq bankine alǵashqy jarna retinde jaraıdy.
«Jyl saıyn Turǵyn úı qurylys jınaq banki arqyly 2-3 myń páter berilip jatyr. Bul baǵyttaǵy jumys jalǵasady. Eger 250 sertıfıkat bitip qalsa, qosymsha qarjy bólinedi. Memleketten bólingen alǵashqy jarna qarjysyn páter ıesi keri qaıtarýy tıis», - dedi oblys ákiminiń orynbasary Serik Tólenbergenov.
«Baqytty otbasy» jobasy aıasynda kópbalaly, tolyq emes jáne múgedek bala baǵyp otyrǵan otbasyǵa páter beriledi. Aqtóbe oblysy boıynsha múgedek bala baǵyp otyrǵan 1101, kópbalaly 1752 jáne tolyq emes otbasynan 7159 adamy kezekke turyp, «Baqytty otbasy» jobasy boıynsha óz esepshottaryna aqsha jınap jatyr. Sońǵy kezderi páter alýǵa ótinish bergen kópbalaly analar qatary artyp keledi.
«Baqytty otbasy» jobasymen páter alý úshin salymshy turǵyn úı baǵasynyń 10 paıyzyn jınaýy kerek. Sol kezde baspana 2 paıyzdyq ústemeaqymen beriledi. Aqtóbe oblysy boıynsha páter baǵasy 10 mıllıon teńgeden aspaýy kerek. Sol kezde 20 jylǵa nesıe beriledi. Jańa jáne ekinshi naryqtaǵy páter de satyp alýǵa bolady, bul joly shekteý qoıylmaıdy. Tek otbasyndaǵy ár adamnyń tabysy 42 500 teńgeden aspaýy kerek. Bul baǵdarlama boıynsha biz ákimdiktiń joldamasymen ǵana páter beremiz», - dedi Turǵyn úı qurylys jınaq banki basqarmasynyń tóraıymy Lázzat Ibragımova.
Aıta keteıik, «Baqytty otbasy» jobasy boıynsha bıyl elimizde 6 myń páter beriledi. Ótinishti alǵash tapsyrǵan adam osy jobamen páter alý múmkindigine ıe.
