«Baqytty otbasy»: Aqtóbede 400-ge jýyq adamnyń ótinishi maquldandy
AQTÓBE. QazAqparat –Aqtóbe oblysy boıynsha bıyl «Baqytty otbasy» baǵdarlamasymen baspanaly bolýdy josparlaǵandarǵa 200 mıllıon teńge bólindi, dep habarlaıdy QazAqparat tilshisi.
Aqtóbe qalasy boıynsha 23 myńnan astam adam páter kezeginde tur. Olardyń 8 myńnan astamy «Baqytty otbasy» baǵdarlamasymen baspanaly bola alady. Ol úshin aldymen Turǵyn úı qurylys jınaq bankine baryp, tólem qabiletin rastaıdy. Keıin ákimdikten alǵashqy jarnaǵa sertıfıkat alý úshin ótinish jazady.
«Qazir 382 ótinish maquldandy. Onyń 132-i kópbalaly, 197-i tolyq emes jáne 53-i múgedek bala asyryp otyrǵan otbasy. Sonyń ishinde 147-i turǵyn úı sertıfıkatyn alýǵa ótinish bildirgen bolatyn. Jalpy alǵanda 99 mıllıon teńgeniń ótinishi maquldandy», - dedi Turǵyn úı qurylys jınaq banki oblystyq fılıalynyń dırektory Jedelbek Myrzaǵalıev. Al baspanaly bolýdy armandaıtyn 400-den astam aqtóbelik otbasy tólem qabiletin rastaı almaǵan. Kóbi jumyssyz, buryn alǵan nesıesin ýaqytyly ótemegen.
«Turǵyn úı sertııkaty bilim, densaýlyq saqtaý, sport, mádenıet salasyndaǵy bıýdjettik mekeme qyzmetkerlerine de beriledi. Olar páter qunynyń 20 paıyzyn tóleýi tıis bolsa, onyń 10 paıyzyna sertıfıkat tabystalady. Biraq aqsha qaıtarymdy, ol 15 jylda 0,01 paıyzdyq ústemeaqymen memleketke tóleıdi», - dedi Aqtóbe qalasy ákiminiń orynbasary Gúlnaz Sısenova.
