Baqytty otbasy: Aqtóbede 35 otbasyna arnaıy sertıfıkat berildi
AQTÓBE. QazAqparat – Aqtóbede áleýmettik jaǵynan az qamtylǵan 35 otbasy alǵashqy jarna retinde arnaıy sertıfıkat aldy, dep habarlaıdy QazAqparat tilshisi.
Jumyspen qamtý, áleýmettik jaǵynan osal topqa kómektesý, kópbalaly analarǵa járdem jaıy búgin óńirlik kommýnıkatsııalar qyzmetinde aıtyldy. Qazirgi kezde óńirde 19 myńǵa jýyq kópbalaly otbasy memlekettik balalar járdemaqysyn alyp otyr. Bul otbasy tabysyna qaramastan beriletin járdemaqy. Bıyl tórt aıda 4805 otbasyna ataýly áleýmettik kómek taǵaıyndaldy. Kepildendirilgen áleýmettik toptama da úlestirildi.
«Jumyspen qamtý organdary arqyly bıyl 53 myń jumyssyz adamdy eńbekke aralastyrý josparlanyp otyr. Onyń 13 myńy jumysqa aralasty. ıAǵnı, 532 adam qysqa merzimdi oqýǵa jiberildi. «Bastaý Bıznes» jobasy aıasynda 599 adam qamtylady. Aıtyp óteıik, memlekettik grant alý úshin ataýly áleýmettik kómek alyp otyrǵan otbasy oqyp, ýaqyt joǵaltpasa bolady. Olar birden ótinish bere alady. Búginde 200 AEK mólsherindegi grant 1182 adamǵa berilmek. Onyń 210-y aldy», - dedi Aqtóbe oblysynyń jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Aqsulý Jubanazarova. Shaǵyn nesıe berý tetigi de qarastyrylǵan. Ony 74 otbasy aldy.
«Az qamtylǵan otbasy turǵyn úı kómegin alýǵa quqyly. Eger kiris kommýnaldyq tólemdi óteýge jetpese, memleket óteıdi. Oblys boıynsha 482 otbasyna 6,1 mıllıon teńge berildi. Al «Baqytty otbasy» baǵdarlamasy boıynsha 35 otbasyna 30 mıllıon teńgeniń sertıfıkaty tabystaldy. Bul páterdiń alǵashqy jarnasy bolyp esepteledi», - dedi Aqsulý Jubanazarova.
