«Baqytty otbasy»: 2% ıpoteka qansha adamǵa beriledi

NUR-SULTAN. QazAqparat – Barlyq baspana baǵdarlamalaryn biriktirip, biryńǵaı túsinikti turǵyn úı saıasatyna aınaldyrý qajet. Bul týraly QR Prezıdenti Qasym-Jomart Toqaev Úkimettiń keńeıtilgen otyrysynda aıtty, dep habarlaıdy QazAqparat tilshisi.

«Ekinshi jartyjyldyqta josparlyq kórsetkishti (baspana salý boıynsha – red.) qýyp jetesizder dep úmittenemin. Jalpy úlken jumys júrgizilip jatyr, biraq baspana qoljetimdigi máselesi sońyna deıin sheshilmedi. 2012 jyly kezekte turǵandar sany 487,8 myńǵa deıin 2 eseden astam kóbeıgen. Kezek únemi ósip keledi. Sondyqtan, QR Tuńǵysh Prezıdenti 2% baspana qaryzy mehanızmi bar «Baqytty otbasy» baǵdarlamasyn usyndy. Bul jaqsy baǵdarlama, birneshe aıdan beri jumys istep keledi. Onyń nátıjesi qandaı?» – dep surady Prezıdent QR INdýstrııa jáne ınfraqurylymdyq damý mınıstri Roman Sklıardan.

Mınıstr jyl sońyna deıin jospar boıynsha 13 mln sharshy metr baspana paıdalanýǵa beriletinin aıtty.

«Biz bul jospardy oryndaımyz. Nur-Sultan qalasy boıynsha 400 myń sharshy metrge qalyp qoıýymyz múmkin, biraq belsendi jumys isteıtin bolamyz. «Baqytty otbasyna» qatysty 2 aıda barlyq erejeni jasadyq, 1 shildede ótinim qabyldaýdy bastadyq jáne búgin tólemder bastaldy. 6 000 nesıe bıyl beriledi», - dedi Roman Sklıar.

Óz kezeginde Prezıdent barlyq baspana baǵdarlamalaryn biriktirýdi usyndy.

«Barlyq turǵyn úı baǵdarlamalaryn biryńǵaı túsinikti baspana saıasatyna shoǵyrlandyrý qajet. Bıylǵy qyrkúıektiń 1-ine deıin bul másele boıynsha usynymdar engizýdi tapsyramyn», - dedi Qasym-Jomart Toqaev.