Baqytty birde-bir mıllıarder kórmedim - Nursultan Nazarbaev

ASTANA. QazAqparat - Eńbegińmen tapqan tabys qana baqytqa jetkizedi. Búgin «Qazaqstannyń 100 jańa esimi» jeńimpazdarymen kezdesýi barysynda Elbasy Nursultan Nazarbaev osylaı aıtty, dep habarlaıdy QazAqparat tilshisi.

«Jumysty eń kóp isteıtin ult - Ońtústik Koreıa. Balany 5 jasqa deıin tárbıeleý kerek, odan keıin paıdasyz. Ony qoǵam, balabaqsha, mektep tárbıeleıdi. Olar 5 jasqa deıin tıispeıdi, urmaıdy. Al odan keıin sómkesin arqalap, ómir boıy tańerteńnen keshke deıin júredi. Japondar da, koreıler de solaı jumys isteıdi jáne «eger sen ana ýnıversıtetke túse almasań, nashar ómir súretin bolasyń» dep aıtady. Maqsatty mıyna sińirip alǵannan keıin onymen kúni-túni aınalysady. Solaı bilimdi, eń kóp jumys isteıtin ultqa aınaldy. ıAǵnı, eńbektiń arqasynda», - dedi Prezıdent.

Memleket basshysy eńbeksiz jetken tabys baqyt bolyp sanalmaıtyndyǵyn basa aıtty.

«Baı ata-anadan mura alýǵa bolady. Biraq, ol bereke bolmaıdy. Ómirde kórgen, tájirıbeli adam retinde aıtaıyn, 10-20 mlrd aqshasy bola tura baqytty bolǵan birde-bir mıllıarder kórmedim. Ózine-ózi qol jumsaǵan nemese túrmedegi mıllıarderlerdiń tizimin de keltire alamyn. Bul qarajat seni baqytty jasaıtyndaı kórinýi múmkin. Biraq óz eńbegińmen tapqan tabys seni baqytty qylady. Sondyqtan kóbirek armandańdar. Senderge tabys tileımin. Myna memleket, meniń qurdastarym, bizdiń býyn qurǵan memleket sender úshin, balalaryń men nemereleriń úshin», - dedi N.Nazarbaev.