Baqytgúl Hamenovanyń isine qatysty sot úkimi 15 qarashada shyǵady
Búgin, 14 qarashada Atyraý qalasyndaǵy №2 sotta Baqytgúl Hamenovanyń isine qatysty sot otyrysy qaıta jalǵasty.
«Erteń, 15 qarashada Baqytgúl Hamenovanyń isine qatysty sot úkimi jarııa etiledi. Sot otyrysy Atyraýdaǵy №2 qalalyq sotta jergilikti ýaqytpen saǵat 10:00-de ótedi», -dep habarlady oblystyq sottyń baspasóz qyzmeti.
Oblystyq sottyń baspasóz qyzmetiniń aqparatyna súıensek, bıylǵy 26 mamyrda Atyraý qalasynyń №2 sotyna QR Qylmystyq kodeksi 366-babynyń 3-bóligi 2-tarmaǵymen Atyraý oblysy ákiminiń orynbasary Baqytgúl Hamenovaǵa, Atyraý oblysy Mádenıet, tilderdi damytý jáne arhıv isi basqarmasynyń basshysy Aqylbek Rysqalıevke, QR Qylmystyq kodesi 367-babynyń 2-bóligimen «B» JShS dırektoryna qatysty qylmystyq is tústi.
Atyraýdaǵy №2 qalalyq sotta Baqytgúl Hamenovaǵa qatysty sot otyrysy 11 tamyzda bastalǵan edi. Aıyptaý aktisi 55 betten turady.
Sot otyrysynda Baqytgúl Hamenova ózine taǵylǵan aıypty moıyndaǵan joq.
Qazannyń 31 kúni ótken sot otyrysynda prokýratýra ókili Baqytgúl Hamenovany 7 jylǵa bas bostandyǵynan, «Qurmet» ordeninen aıyrýdy usyndy.
Eske sala ketelik, budan buryn Baqytgúl Hamenovanyń isine qatysty sot otyrysy qaıta jalǵasqanyn jazǵan edik.
Búgin, 14 qarashada ótken sot otyrysynda Atyraý oblysy ákiminiń burynǵy orynbasary Baqytgúl Hamenovaǵa sońǵy sóz berildi.
«Meniń bul qylmystyq oqıǵaǵa qatysym bolǵan joq. Osy is boıynsha zańǵa sáıkes aqtaý úkimi shyǵarylýy múmkin», -dedi Baqytgúl Hamenova.