Baqytgúl Hamenovanyń isine qatysty kezekti sot otyrysy keıinge qaldy

ATYRAÝ. QazAqparat – Baqytgúl Hamenovanyń isine qatysty sot otyrysy keıinge qaldy. Buǵan onyń advokatynyń sot otyrysyna qatysa almaıtyny sebep boldy, dep habarlaıdy QazAqparat tilshisi.

Búgin, 27 qazanda Atyraý oblysy ákiminiń burynǵy orynbasary Baqytgúl Hamenovanyń isine qatysty kezekti sot otyrysy ótýi tıis edi. Alaıda, otyrys ótken joq. Buǵan Baqytgúl Hamenovanyń advokaty Igor Vranchevtiń densaýlyǵyna baılanysty sot otyrysyna kelmeı qalýy sebep boldy. Advokat sýdıaǵa sot otyrysyn kelesi aptaǵa aýystyrý týraly jazbasha ótinish túsirgen.

Aıta ketsek, oblystyq sottyń baspasóz qyzmetiniń aqparatyna súıensek, bıylǵy 26 mamyrda Atyraý qalasynyń №2 sotyna QR Qylmystyq kodeksi 366-babynyń 3-bóligi 2-tarmaǵymen Atyraý oblysy ákiminiń orynbasary Baqytgúl Hamenovaǵa, Atyraý oblysy Mádenıet, tilderdi damytý jáne arhıv isi basqarmasynyń basshysy Aqylbek Rysqalıevke, QR Qylmystyq kodesi 367-babynyń 2-bóligimen «B» JShS dırektoryna qatysty qylmystyq is tústi.

Baqytgúl Hamenova Atyraý oblysy ákiminiń orynbasary laýazymyna 2020 jylǵy naýryzda taǵaıyndalǵan edi.

Byltyrǵy jeltoqsanda ol tergeý ızolıatoryna qamaýǵa alyndy.

Osyǵan baılanysty bıylǵy tamyzda oblys ákiminiń orynbasary qyzmetinen bosatyldy.

Al, 11 tamyzda Baqytgúl Hamenovaǵa qatysty sot otyrysy bastaldy. Onyń isi Atyraýdaǵy №2 qalalyq sotta qaralyp jatyr. Aıyptaý aktisi 55 betten turady.

Alǵashqy sot otyrysynda Baqytgúl Hamenova ózine taǵylǵan aıypty moıyndaǵan joq.

Sot otyrysy 6 qyrkúıekte qaıta jalǵasyp, oblys ákiminiń burynǵy orynbasary jibergen qateligi týraly aıtty.

Budan keıingi sot otyrysynda basqarma basshysy oǵan jala japqany týraly aıtqan edi.

Keıin Baqytgúl Hamenova taǵy da tergeý ızolıatorynan úı qamaqqa jiberilmegenin jazǵan edik.

Endi Atyraý oblysy ákiminiń burynǵy orynbasaryna qatysty sot otyrysy kelesi dúısenbide, 31 qazanda saǵat 10:00-de ótedi.