Baqytgúl Hamenovaǵa qatysty sot otyrysy 14 maýsymda ótedi
Іs Atyraý qalasynyń №2 sotynda qaralady.
Buǵan deıin Baqytgúl Hamenovaǵa qatysty qylmystyq is sotqa jetkenin jazǵan edik.
Oblystyq sottyń baspasóz qyzmetinen málim etkendeı, bıylǵy 26 mamyrda Atyraý qalasynyń №2 sotyna QR Qylmystyq kodeksiniń 366-babynyń 3-bóliginiń 2-tarmaǵymen Atyraý oblysy ákiminiń orynbasary Baqytgúl Hamenovaǵa, Atyraý oblysy Mádenıet, tilderdi damytý jáne arhıv isi basqarmasynyń basshysy Aqylbek Rysqalıevke, QR Qylmystyq kodesiniń 367-babynyń 2-bóligimen «B» JShS-niń dırektoryna qatysty qylmystyq is túsken.
«Osyǵan baılanysty basty sot otyrysyn ótkizý jóninde sheshim qabyldandy. Basty sot otyrysyn 2022 jylǵy 14 maýsymda saǵat 14:45-te ótkizý taǵaıyndaldy», -dep málim etti oblystyq sottyń baspasóz qyzmetinen.
Atyraý oblysy ákiminiń orynbasary Baqytgúl Hamenova byltyrǵy jeltoqsanda qamaýǵa alynǵan. Onymen birge mádenıet, arhıvter jáne qujattama basqarmasynyń basshysy Aqylbek Rysqalıev para alý kúdigine ilingen. Kúdiktilerge Abaı eskertkishin jasaý jáne ornatý boıynsha 145 mln teńge somasyna memlekettik satyp alý shartyn jasaǵany úshin bir top adammen aldyn ala sóz baılasý arqyly JShS basshysynan 4,5 mln teńge somasynda para alý kúdigimen qylmystyq is qozǵaldy.
Atyraý oblysynyń arnaıy tergeý soty ýaqytsha ustaý ızolıatorynda otyrǵan oblys ákiminiń orynbasary Baqytgúl Hamenovany úıqamaqqa alý týraly sanktsııa bergen bolatyn.
Keıin ol tergeý ızolıatoryna qamaldy. Atyraý oblysy ákiminiń orynbasaryna qatysty qylmystyq is QR Qylmystyq kodeksiniń 366-babynyń 2-bóligimen (kóp mólsherde para alý) tergeldi.
Baqytgúl Hamenova Atyraý oblysy ákiminiń orynbasary laýazymyn atqarýǵa 2020 jylǵy 13 jeltoqsanda taǵaıyndalǵan.