Baqytgúl Hamenovaǵa qatysty qylmystyq is sotqa jetti
Qylmystyq is Atyraý qalasynyń №2 sotynda qaralady.
«Bıylǵy jyldyń 26 mamyrynda Atyraý qalasynyń №2 sotyna QR Qylmystyq kodeksiniń 366-babynyń 3-bóliginiń 2-tarmaǵymen Atyraý oblysy ákiminiń orynbasary Baqytgúl Hamenovaǵa, Atyraý oblysy Mádenıet, tilderdi damytý jáne arhıv isi basqarmasynyń basshysy Aqylbek Rysqalıevke, QR Qylmystyq kodesiniń 367-babynyń 2-bóligimen «B» JShS-niń dırektoryna qatysty qylmystyq is tústi», -dep málim etti oblystyq sottyń baspasóz qyzmetinen.
Budan buryn Atyraý oblysy ákiminiń orynbasary qamaýǵa alynǵan edi.
Sybaılas jemqorlyqqa qarsy qyzmet óziniń Telegram paraqshasynda málim etkendeı, Atyraý oblysy ákiminiń orynbasary men mádenıet, arhıvter jáne qujattama basqarmasynyń basshysy para alý kúdigine ilingen. Kúdiktiler Abaı eskertkishin jasaý jáne ornatý boıynsha 145 mln teńge somasyna memlekettik satyp alý shartyn jasaǵany úshin bir top adammen aldyn ala sóz baılasý arqyly JShS basshysynan 4,5 mln teńge somasynda para alǵan.
Osyǵan baılanysty Atyraý oblysynyń arnaıy tergeý soty ýaqytsha ustaý ızolıatorynda otyrǵan oblys ákiminiń orynbasary Baqytgúl Hamenovany úıqamaqqa alý týraly sanktsııa berdi. Keıin ol tergeý ızolıatoryna qamaldy.
Atyraý oblysy ákiminiń orynbasaryna qatysty qylmystyq is QR Qylmystyq kodeksiniń 366-babynyń 2-bóligimen (kóp mólsherde para alý) tergeldi.
Baqytgúl Hamenova Atyraý oblysy ákiminiń orynbasary qyzmetin 2020 jylǵy 13 naýryzda taǵaıyndalǵan bolatyn.