Baqytgúl Hamenova taǵy da tergeý ızolıatorynan úı qamaqqa jiberilmedi
Atyraýda oblys ákiminiń burynǵy orynbasary Baqytgúl Hamenovaǵa qatysty sot otyrys qaıta jalǵasty.
Sot otyrysynda advokat Igor Vranchev tergeý ızolıatorynda otyrǵan Baqytgúl Hamenovanyń bultartpaý sharasyn úıqamaqqa nemese eshqaıda ketpeý týraly qolhatpen aýystyrýdy surady.
«Adam bostandyqta ózin jaqsy sezine me, bilmeımin. Biraq túrmede kútken ár saǵat, ár sát – adamnyń taǵdyry. Sondyqtan, men advokatymnyń dálelderimen kelisemin», -dedi Baqytgúl Hamenova.
Alaıda, prokýroratýra ókili Baqytgúl Hamenovaǵa qatysty is aýyr quqyq buzýshylyq retinde saralanǵandyqtan, bul ótinishti qanaǵattandyrýdan bas tartýdy surady. Sot Baqytgúl Hamenovaǵa taǵylǵan aıyptyń aýyrlyǵyn eskerip, advokattyń ótinishin qanaǵattandyrǵan joq.
Oblystyq sottyń baspasóz qyzmetiniń málimetinshe, bıylǵy 26 mamyrda Atyraý qalasynyń №2 sotyna QR Qylmystyq kodeksi 366-babynyń 3-bóligi 2-tarmaǵymen Atyraý oblysy ákiminiń orynbasary Baqytgúl Hamenovaǵa, Atyraý oblysy Mádenıet, tilderdi damytý jáne arhıv isi basqarmasynyń basshysy Aqylbek Rysqalıevke, QR Qylmystyq kodesi 367-babynyń 2-bóligimen «B» JShS dırektoryna qatysty qylmystyq is tústi.
Baqytgúl Hamenova byltyrǵy jeltoqsannan beri tergeý ızolıatorynda otyr. Oǵan qatysty sot otyrysy 11 tamyzda bastaldy.
Qazir onyń isi Atyraýdaǵy №2 qalalyq sotta qaralyp jatyr. Aıyptaý aktisi 55 betten turady.
Buǵan deıin Baqytgúl Hamenova ózine taǵylǵan aıypty moıyndaǵan joq. Ol bıylǵy tamyzda oblys ákiminiń orynbasary qyzmetinen bosatyldy.
Sot otyrysy 6 qyrkúıekte qaıta jalǵasyp, Baqytgúl Hamenova qatelik jibergenin aıtty.
Budan burynǵy sot otyrysynda basqarma basshysy oǵan jala japqany týraly aıtqanyn habarlaǵan edik.
Endi sot otyrysy 27 qazanda jalǵasady.