Baqytbek Smaǵul: Elbasynyń maqalasy - Máńgilik eldiń «rýhanı damý tujyrymdamasy»
ASTANA. QazAqparat - El Prezıdentiniń «Bolashaqqa baǵdar: rýhanı jańǵyrý» atty baǵdarlamalyq maqalasyn qazaqstandyq qoǵamnyń jáne Máńgilik eldiń «rýhanı damý tujyrymdamasy» dep ataýǵa da bolady. Sol arqyly Qazaqstannyń mádenıeti jahandyq keńistikke qanat qaǵady, al bilimi men ǵylymy ınnovatsııalar men tehnologııa órisine órken jaıady.
QR Parlamenti Májilisiniń depýtaty, QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń múshesi, Aýǵan soǵysy ardagerleri uıymdarynyń «Qazaqstan ardagerleri» qaýymdastyǵynyń tóraǵasy Baqytbek Smaǵul osyndaı pikir bildirdi.
«Elbasy qazaqstandyqtar aldynda shyn máninde shyǵarmashylyq erkindik pen ómirlik múmkindikter ashyp otyr. Bul - zamanaýı damýdyń sharty, altyn arqaýy. Ony der ýaqytynda paıdalana alýǵa, iske asyra bilýge tıispiz», - deıdi ol.
Onyń aıtýynsha, qazirgi zaman qajyrly eńbekti, qaıratty kúresti talap etedi. Qazaqstan kóshbasshysy aıtqanyndaı, biz ulttyq kodymyzdy saqtap, bolmysymyzdy jat ıdeologııalardan qorǵaýymyz kerek. Jáne memlekettilikke tóngen jahandyq syn-qaterler sany artqan saıyn «kúres keńistigi» de keńeıýde: memleketter úsh basty ajdahadaı antalaǵan ekstremızmmen, separatızmmen, terrorızmmen kúresýge májbúr.
«Tynymsyz kúresten qajyǵan, áleýetin túgesken elder óz tarıhynyń sońyna taıaıdy, jolynyń tyǵyryq, tuıyǵyna tireledi. Al jasampazdyq tanytyp, udaıy jańǵyrý jolynan taımaǵan memleketter ǵana kezekti tarıhı belesine kóteriledi. Qazaqstan rýhanı kemeldengen memleketke aınalsa, óz damýyn «Bolashaq progress qýatymen» toltyratyn bolady», - deıdi B.Smaǵul.
