Baqytbek Smaǵul: Daý men jaýdan alys bolyp, birligimizdi saqtaıyq

NUR-SULTAN. QazAqparat – Parlament Májilisiniń depýtaty Baqytbek Smaǵul Qordaı aýdanyndaǵy janjalǵa baılanysty Jambyl óńirine attanyp ketti. Depýtattyń aıtýynsha, qazir el ishin ala taıdaı búldirmeı, el birligin tanyta bilýi kerek, dep habarlaıdy QazAqparat tilshisi.

«Qordaı jaqtan osy habardy estigennen keıin áriptesim Shákir Hahazov ekeýimiz birden sol jaqqa jolǵa shyqtyq. Eldiń jarasyn tyrnaǵanymyz durys emes. Odan da sabyr men aqylymyzdy serik etip, eldi tatýlyqqa shaqyramyn. Asyl halqymyzdyń basynan ne ótpedi. Sondyqtan bereke-birligimiz, elimizdiń bolashaǵy, erteńimiz úshin tynyshtyq qajet. «Ashý – dushpan, aqyl - dos» deıdi dana halqymyz. Biz endi dabyramen emes, sabyrmen kóp nárseni sheshken halyqpyz ǵoı. Daý men jaýdan alys bolaıyq. Óz berekemizdi, birligimizdi saqtaıyq», - deıdi Baqytbek Smaǵul.

Buǵan deıin Jambyl oblysy Qordaı aýdanyndaǵy Masanchı aýylynyń turǵyndary arasynda jappaı tóbeles bolǵanyn habarlaǵan bolatynbyz. Kóp ótpeı Prezıdent Qasym-Jomart Toqaev Jambyl oblysy Qordaı aýdanynda bolǵan jappaı tóbeleske qatysty pikir bildirgen-di.

«Jambyl oblysy Qordaı aýdanynda buzaqylyq sıpattaǵy jappaı tóbeles boldy. Ony arandatýshylar óz paıdasyna qoldanbaq bolǵan. Polıtsııa jaǵdaıdy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady» dep jazdy Qasym-Jomart Toqaev Twitter paraqshasynda.

Al búgin Memleket basshysy Jambyl oblysyndaǵy oqıǵaǵa baılanysty málimdeme jasady.