Baqytbek Smaǵul: Birlik bolý úshin ardagerlerdiń úni bir jerden shyǵý kerek
Jıynda sóz alǵan QR Parlamenti Májilisiniń depýtaty, Qazaqstan Ardagerleri qaýymdastyǵynyń tóraǵasy Baqytbek Smaǵul Respýblıkalyq Aýǵan soǵysy ardagerleri uıymdary ortalyq keńesiniń atynan Memleket basshysy Qasym-Jomart Toqaevtyń atyna úndeý joldanǵanyn eske saldy. Sondaı-aq, ol Qorǵanys mınıstrliginiń janynan urpaq tárbıesine ardagerlerdi qatystyratyn komıtet qurylýy kerek degen usynys aıtty.
«Aýǵan soǵysyna qatysqandar bolsyn, Tájikstan shekarasyndaǵy qaqtyǵysqa qatysqan jigitter bolsyn, báriniń áskerı ómirden kórgen tájirıbesi mol. Sol tájirıbesin jas urpaq tárbıesine úles qylyp qosýy kerek dep esepteımiz. Sebebi, eshkimge jasyryn emes, elde áskerden boı tasalap júrgen 6 myńǵa jýyq adam bar. Kóbiniń áskerge barǵysy kelmeıdi, kerisinshe habarlasyp, qalys qalýǵa bola ma dep surap jatady. Onyń barlyǵy bolmaýy úshin saladaǵy júıeni durystaý kerek. Qorǵanys mınıstrliginiń janynda komıtet qurylsa dep júrgenimiz osy oıdan týǵan. Qanshama táýelsizdikke eńbek sińirgen generaldarymyz, ofıtserlerimiz bar?! Solardyń ózin merekelerde mınıstrlikke shaqyryp, gramota berýmen shektelip júrmiz. Al mınıstrlik janyndaǵy komıtet bolǵanda barlyq kúsh bir ortalyqqa biriger edi. Osyndaı máseleler bolmas edi. Árqaısysy túrli tarapqa hat jazyp, árbir qoǵamdyq jaǵdaıǵa bizdiń ardagerlerdiń atyn paıdalanyp, qolshoqpar qylyp almas edi. Bir jerde bolar edik. Ásker qatarynda bolǵannan keıin, ómir kórgennen keıin ardagerlerdiń urpaqqa bereri kóp. Komıtettiń mańyzy osynda dep oılaımyn», - deıdi depýtat.
Al Respýblıkalyq Aýǵan soǵysy ardagerleri uıymdary ortalyq keńes tóraǵasynyń orynbasary Sháripbaı Ótegenov Prezıdent atyna úndeý jarııalaýdyń áleýmettik sebebi de bar ekenin atady.
«Soǵys 1989 jyly Aýǵanstanda aıaqtaldy. Biraq soǵys aıaqtalǵanmen ol týyndatqan problemalar aıaqtalǵan joq. Jigitter sol jerden fızıkalyq jáne psıhologııalyq jaraqattarmen oraldy. Olar naǵyz is basyna kelip, qoǵamdyq ómirege atsalysar tusta KSRO ydyrap, táýelsiz elimizdiń bizden de basqa problemasy jetkilikti boldy.
Ol kezde biz óz quqyqtarymyzdy tabandy talap etpegen edik. Óıtkeni halyq qınalyp jatqanda óz múddemizdi alǵa tartý azamattyqqa syn dep eseptedik. Ýaqyt óte kele, 1999 jyly alǵashqy jeńildikter berildi. Keıin olar aqshalaı járdemaqyǵa aýystyryldy. Biraq sol jeńildikter áli kúnge deıin barlyq shyǵyndardyń úshinshi nemese tórtinshi bóligin jaba almaıdy. Biz 1999 jyly berilgen jeńildikter azaıtyldy dep sanaımyz jáne qazir biz laıyqty ómir súrýimiz úshin osy ótemaqylardyń laıyqty bolýyn surap otyrmyz», - dedi ol baspasóz konferentsııasynda.
